Home Beseda po domaću Rapski kantunić Josa Fafanđela: MUKA VELEBITA

Rapski kantunić Josa Fafanđela: MUKA VELEBITA

0
Rapski kantunić Josa Fafanđela: MUKA VELEBITA

Foto: Fotografije: Goran Novotny

 

Da, i Velebit se je, na velu žalost, nagoril. Celu šetemanu na šejst mesti gori i navelo dimi, malo po buri na doli, pa malo po dolnjaku na gori. A kuliko san puti na svaki modi falil tu našu velu i lipu planinu, oli goru kako mi to po domaću rečemo. Boj, kada su nidanji naši stari laurali gori po Velebitu, nebi se reklo da gredu na Velebit nego – va Goru.

Rab danas oglas

Govori se da su Mlečani već jedan put celi Velebit posikli i ogolili, i da je jedva potle parsto godin nanovo pozelenil. Nebi bilo lipo da ga sada mi pustimo na milost i nemilost, da nanovo jadan zasvin oćelavi

 

Ben, ma to sada ni važno, boj evo, tuka me Velebit gledat kako jadan gori i dimi, a malo se čuje da ki ča po tomu poduzimlje. Ala šu, valja razumit da gori duron i doli po Dalmaciji i da je jednako žalosno i grubo za vit kako plamen liže masline kolo kuć, oli trsja va kiman je grozje prid trgatvu, da ne govorin kako i kuće lako moru bit na redu. Zato bi se i ja složil da to triba najprvo ogasit i kako-tako stavit na red, a Velebit tobože, more malo i čekat. Ma jopet, ako tamo gori oganj već duron i više od jedne šetemane, unda je za promislit kuliko je toga zgorilo i to ne va bilo komu gušću nego va našemu nacionalnomu parku. Pa nati mod gori vela i lipota i vridnota, makar na sriću tamo ni ljudi, kuć, verdure i voća. Ima beštij, ma ja se nadan da se one nikakor i same snajdu. One vele ke moru bižat, ma one male, bojin se da su va grubomu paklu.

A sve je to vela škoda. I ono po Dalmaciji i ovo prid našiman očiman na lipomu Velebitu. Eto, zato svaki dan virin s krnoćalan gori, tobože, da šervan kakovo je stanje i čini se ča, oli ne, da se i to zlo ferma. A najviše strahujen, da se oganj ne raširi va oni veli i zeleni gušći, boj bojin se da bi to bil jedan veli kaštig.

Govori se da su Mlečani već jedan put celi Velebit posikli i ogolili, i da je jedva potle parsto godin nanovo pozelenil. Nebi bilo lipo da ga sada mi pustimo na milost i nemilost, da nanovo jadan zasvin oćelavi

Napisal: Joso Fafanđel – Za Rab Danas, 25.8.2017.

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime