logo mix

Rab Danas

Nezavisni internetski portal otoka Raba

×

Upozorenje

JUser: :_load: Nije moguće učitavanje korisnika sa ID: 745
Srijeda, 20 Rujan 2017 13:13

Rapski kantunić Josa Fafanđela: DAŽ oli baba Marija (Dumika) i povodanj na Rabu

Napisao/la
Ocijeni sadržaj
(1 glas)
Rapski kantunić Josa Fafanđela: DAŽ oli baba Marija (Dumika) i povodanj na Rabu Foto: Darija Jureša

Ne ove šetemane, nego odavna već, jednu san pismicu naspisal, a rekal san neka se zove - Daži. 


    Jugo puše / Oblak biži / Mokrinja se za robu ćapiva / A daži / Samo daži. / Kite kaplju / Sve je mokro / Pušća cerada / Voda toči / A daž pada i pada. / 
    Zemlja se natopila / Kabanica promočila / Trava leži / A beštije se rivaju i štišću / Nebo lampa i grmi / A vajk i duron / Samo daži i daži. 

 

Pametin kako bi baba mahala z rukamin, pokaževala i govorila kako su celo mundanisko i draško polje bili zasvin pod vodon, a bujica da je tekla ozgora po dragamin od Fruge i da je sobon nosila vela brimena od škalje i zemljine.

 Oštija, ma ovu pismicu kako da san jušto ovih dan napisal. Nidanji lipi deveti misec kako da je načisto poludil i preobukal se i zamaškaral va daž i mokrinju. Pismica sve lipo govori, a samo je još tribalo nadodat kako se po putima taču mocire, padaju brizi, potoci buču, a va Dolnju uicu jedino se na vesla more arivat. Svi redon govoru kako ovo još za svoga životu nisu doživili. Ben, ma nimaju pravo, boj uvakovoga dažja je i prvije bilo. Ala šu, ma ne po leti, oću reć va mirnomu devetomu misecu, nego po zimi, oli tamo na proliće.

 

Istešo, oću reć kako je va ono staro vrime bilo i uvakovoga, ali i većega dažja. Moja baba Marija (Dumika) rođena je 1888.godine i danas je pokojna, dabome, ali nikad ne moren zaburavit da mi je kako malomu dišku povidala o jednomu velomu povodnju na Rabu, a nisan zapametil kada se je to dogodilo, ma još prvije i onoga prvoga rata, oli more bit zeru potlije. Pametin kako bi baba mahala z rukamin, pokaževala i govorila kako su celo mundanisko i draško polje bili zasvin pod vodon, a bujica da je tekla ozgora po dragamin od Fruge i da je sobon nosila vela brimena od škalje i zemljine. Ta se škalja i danas more šervat šoto, na dnu svake drage, a od veloga takanja najviše je jajasta i balasta. Tu nesriću ljudi su zvali veli povodanj (poplava).

Ljudi govoru da se današnje poplave na Rabu dogajaju zato boj da se više ne čistu ni potoci, ni sve one male griblje ke bi se va nidanja vrimena kolo svake njivice zduble i redovito čistile. Znali su ljudi kakovu škodu more učint vela voda. Danas dabome, sve je zapušćeno, potoci su zagrađeni i puni trstike, a voda mora teć - i to nadoli, kako se ono reče.

 

Ala šu, bilo je povodnja i ovih dan na Rabu. Gruboga, ma isto ne unako veloga kako ono jedan put. Ljudi govoru da se današnje poplave na Rabu dogajaju zato boj da se više ne čistu ni potoci, ni sve one male griblje ke bi se va nidanja vrimena kolo svake njivice zduble i redovito čistile. Znali su ljudi kakovu škodu more učint vela voda. Danas dabome, sve je zapušćeno, potoci su zagrađeni i puni trstike, a voda mora teć - i to nadoli, kako se ono reče. Jedino se sve ovo ni smilo dogodit va devetomu misecu. Deveti misec ni va štajunu od veloga dažja, pa zato i govorin da je i un zasvin poludil. 

- A ča ćeš, govori mi nato jedan naš čovik, poludi pulitika, poludismo mi, poludi celi svit, pa unda i ni čudo da je i vrime poludilo.

 

  • Napisao: Josip Fafanđel (rujan 2017.)
Pročitano 2373 puta

Ova e-mail adresa je zaštićena od spambota. Potrebno je omogućiti JavaScript da je vidite.

seakayakcroatia