logo mix

Rab Danas

Nezavisni internetski portal otoka Raba

×

Upozorenje

JUser: :_load: Nije moguće učitavanje korisnika sa ID: 745
Petak, 08 Prosinac 2017 13:26

Rapski kantunić našega Josa Fafanđela: GRIPA

Napisao/la
Ocijeni sadržaj
(1 glas)

Mrzli su dani, štajun je od zime, a meni se čini kako se ovih dan sve manje govori o gripi. Zadnji put su spominjali tu bolešćinu ono kada je nestalo špunti za cipat se kuntra nje, pa ki se je cipal - cipal se je. A ja se do sada nisan nikad cipal, a moj sused ki je već bližje osandesetoj nego sedandesetoj, isto mi govori da se ni un ni nikad cipal, pa da neće brate ni sada.

 

Dabome, ljudi se boju te vražje gripine, a pugotovo oni ki su je već provali, pa govoru kako je to vela muka, boj da čovika va postilji sve živo boli, od febre goriš, niš ne moreš i niš te ni volja. Kako je da je, ma bolešćine su gruba stvar.

A jušto ovih dan kuntrivan ja jednoga moga kumpanja Tončića, pa ga pitan da kako je, a un mi govori:

- A kako? Ja dobro, ma žena je va postilji.

- Ala da je jadnu gripa obalila?, pitan ga ja, a un mi govori:

- A ni ne, ni je gripa obalila va postilju, a nažalost nisan ni ja. Nego da su je križa latila bolit i to jako grubo pa da leži na postilji i duron samo skuca i skuca. I to jako naglas. A znaš ti, govori un meni, da je naša kuća na samoj cesti, pa se vani sve čuje ča se va kući dogaja. A žena samo skuca boj da je boli. Muči, govorin ja njoj, ja razumin da te boli, ali nemoj skucat boj će ju te ljuti zvana čut.

- Pa neka me čuju, govori ona njemu, ča je mene zato briga, meni je kako laglje kada naglas skucan.

- E lipa moja, da un nato govori njoj, i to ja razumin, ali ljudi kada čuju skucanje va sobi promislit će, nedaj Bog, da se ti i ja - seksamo.

- Hodi kvargu, da mu govori žena, ne čini me smijat se boj me unda još i više boli.

- I to ti je ta dupla kumedija prijatelju moj, govori Tančić meni, boj ja moran duron, svako tuliko, hodit van na dvor, da ljudi ki pasivaju vidu da ja nisan šnjan va sobi. Tako ona va postilji skuca, a ja jadan vani - na dvoru drhćen!

 

  • Napisal: Joso Fafanđel (8.12.2017.)
Pročitano 2200 puta

Ova e-mail adresa je zaštićena od spambota. Potrebno je omogućiti JavaScript da je vidite.

seakayakcroatia