logo mix

Rab Danas

Nezavisni internetski portal otoka Raba

  • Imperial Rab
Ponedjeljak, 26 Veljača 2018 16:51

Rapski kantunić našega Josa Fafanđela: MRZLINJA I POSAL

Autor:
Ocijeni sadržaj
(3 glasa/-ova)
Rapski kantunić našega Josa Fafanđela: MRZLINJA I POSAL Foto: Hrvoje Hodak

Ovo vrime ko nas je ovih dan zateklo govori kako je najbolje lipo stat doma, ložit oganj i teplit se. A ča ćemo čint va kući neka svaki bira za sebe. Puno od njih čujen kako znaju reć da je njiman najgore kada je grubo vrime pa ne moru s kuće van. A grubo je vrime ne samo kada je mokro i daži, nego je još više grubo kada bura puše, a unda još uzato i ruke i uši zebu. Ako mene pitate meni ki put i dobro dojde da ne moran poć s kuće van, boj ja i va kući iman posla da ga ni triba puno iskat. Ma ako ga ki put i ne moren nać, ni straha, nać će ga već moja parona i to vreda, za ajn-cvaj.

 

Hitan ja ovih dan ruku tamo kadi novine stoju, ma novin ni. Zaburavin da bura puše, a novine su od preščerma, pa san unda i na buru ljut jušto kako i na telviziju. Rečen va sebi: a rozi brate obadviman...

Ala šu, ki put me i televizija prevari. Varamente, kroz dan se puno vanju ne pačan, ali jušto kada je grubo vrime unda je ki put badnen, pa virin vanju dokli na kanati ne šervan kako me više jada nego veseli. A neda mi vrag mira, pa neću da je ugasin, nadan se, tobože, da će more bit i ča dobroga doć nared. Ma dogodi se da me zazbilja i naljuti, pa badnen zgušton onaj botunić za ugasit je, unako z daleka, i oću novine zet va ruke. Ali hitan ja ovih dan ruku tamo kadi novine stoju, ma novin ni. Zaburavin da bura puše, a novine su od preščerma, pa san unda i na buru ljut jušto kako i na telviziju. Rečen va sebi: a rozi brate obadviman...

 

Ben ma ima i onih ki se ne moru va kući teplit. Obašal san malo ovih dan naš lipi Grad. Svi govoru kako je pust i nikakov, da se po ulicah jedino pasa i mašku more kuntrat. Ali evo, ako ni ljudi, ma tamo se isto niki vrag dogaja. Laura se i to navelo. Partil san tamo od Nove rive pa san najprvo nabasal na hotel Arbiana. Sve su uzanjega i kolo njega rastakali i raskopali. Oćeju ljudi jednu zvezdicu više. A bazen činu jušto Cicu pod barkun, ča je va jednu ruku i dobro, da baren Cico more pod stari dani hitit oko na mlade i goluškaste ženskice.

 

Potle gren naprvo, pa livo kod popove kuće jopet lauraju. Pitan, pa mi govoru da će tamo narast još jedan novi restoran. Ala neka, govorin sam sobon, pa gren jopet gori naprvo, a tamo med kuće va Kaldancu čujen kako se navelo i pili i brusi. Kalivan se od Pjacete doli i dabome, Dolnja ulica je cela raskopana i sve je va jednomu velomu poslu.

 

Ma čuda veloga, sve se mislin - grad pust, nidiri čovika za vit, svi portuni zatvoreni, a na sve bande se navelo laura. Jušto kako va nikoj štoriji od Ivane Brlić Mažuranić: vela kula, oli dvorac va komu niki ne stoji, a svake noći se nutri čuju marteline, lopate i mišalice za bitun. Neka se čuju, kad se razdani - more bit da će se i ljudi jednoga jutra pojavit.

Pročitano 3999 puta
Josip Fafanđel

Ova e-mail adresa je zaštićena od spambota. Potrebno je omogućiti JavaScript da je vidite.

seakayakcroatia

 

Popularno

Novi oglasi

Gliser Elan
( / Auto, moto, nautika)

Gliser Elan

Ford Cmax 2016.g.
( / Auto, moto, nautika)

Ford Cmax 2016.g.

Održavanje nekretnina
( / Nekretnine, zemljišta i prostori)

Održavanje nekretnina

Posljednje teme s tužibabe

U nastavku dostavljam slijed dopisa koje sam slao komunalnom redaru, gradonačeln...
Prije 1 godinu 0 12915
Imate neki problem koji treba netko riješiti... Ne znate tko je nadležan za rješ...
Prije 3 godina 0 21869

Novo u imeniku

Web Arba

Obrt Web Arba od 2005. posluje na otoku. Bavi se servisom računala i računalne opreme, izradom…

Sea Kayak Croatia

Mala tvrtka za velike doživljaje na Jadranu!