Home Beseda po domaću Rapski kantunić našega Josa Fafanđela: ISTANBULSKA KONVENCIJA

Rapski kantunić našega Josa Fafanđela: ISTANBULSKA KONVENCIJA

0
Rapski kantunić našega Josa Fafanđela: ISTANBULSKA KONVENCIJA

Foto: RabDanas

 

Svit oće očuvat ženska prava i sve to stabelo zakoniman ošaldat, a oni činu munade da će ju muški hodit va ženski zahodi. Ni straha, neće – jedino ako je potriba

Rab danas oglas

Ben, sve je to lipo ma kako ča smo mogli šervat nisu svi istoga mišljenja o svemu tomu. Oni ki vajk činu niku smutnju, ja bi diboto tako rekal, tobože se slažu da ženske moraju imit svoja prava, ali dižu glas kolo nike vražje rodne ideologije. Čudnovate su to nike besede za kih malo ki i zna ča govoru i ča oćeju reć. A ja bi diboto rekal da i više od pol onih ki su kuntra i ki nato njujaju isto ne znaju ča je to, o čemu govoru i kuntra čega se kuntreštivaju. Boj, tobože da oni nećeju da jednoga dana njihova muška dica budu ženska, a ženske da budu muški. Kako da ih pulitika takovima more učint, a ne priroda, gen, Bog, oli vrag, kako već oćete. Pa ako su se već takovi začali neka i budu unakovi kakovi jesu.

 

A ovi ča su kuntra jopet strahuju i govoru da će ju muški hodit va žeski zahodi, a žeske va muški. Ajme meni ma kakove su to šordarije, a diboto bi rekal da jadne i one škole ke su takovi završili. Svit oće očuvat ženska prava i sve to stabelo zakoniman ošaldat, a oni činu munade da će ju muški hodit va ženski zahodi. Ni straha, neće – jedino ako je potriba. A kuliko puti se je i meni znalo dogodit, tobože ono kada je vela preša a muški zahod je zauzet, unda ni druge nego provat kvaku, pa se vreda va žeski zatvorit. A ča to ni bolje nego, da prostite, sve ono nutra va gaće spraznit. Unda se pomalo pošuljaš van i nikomu niš, dabome.

Da, jedino preša nezna ča je to Istanbulska konvencija.

 

  • Napisal: Joso Fafanđel (6.4.2018.)

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime