logo mix

Rab Danas

Nezavisni internetski portal otoka Raba

  • Imperial Rab
Utorak, 23 Listopad 2018 10:58

Rapski kantunić Josa Fafanđela: DUPERANJE

Autor:
Ocijeni sadržaj
(1 glas)
Rapski kantunić Josa Fafanđela: DUPERANJE Foto: Hrvoje Hodak

Kuntrivan ja Anđela Brnu va onomu novomu gradu, tobože Šarengradu, va Malomu Palitu. Gre un po ulici, ali vajk va zadnje vrime gre samo od sazmorca. Tobože, tamo od banke pa na vamo. Nikad z druge bande.

 

A meni neda vrag mira pa ga pitan da kako to da vajk gre zone bande, duron po istomu putu? 

- Gren zone bande zato, govori un meni, boj san bil na abulanti.

- Je, ma već par dan greš od tamo na vamo, govorin mu ja.

- Ne par dan, govori un meni, nego i više od par dan zaredon i to zato boj svaki dan gren va abulantu.

I dabome, ja ga unda pitan da koga vraga gre svaki dan va abulantu? A un se je nato nasmijal pa mi govori: - A za koga vraga smo unda i učinli onu lipu i velu abulantu i brime šoldi za to potrošili? Ako smo je učinli unda triba va nju i hodit, valja je i duperat!

 

Istešo, kako je da je, ali na taj sulac vreda se nadodivaju i druge ćakule na isti mod. Tako i naš Dom za stariji ljudi, a da ne spominjen i našu kanalizaciju. Oštija i nju smo učinli da bi je mogli duperat. Boj, pasalo je vrime kada smo kopali jame i na njiman zidali kundoti i to vani kolo kuć. Varamente, oni ki su zidali kuće uz more, nisu više ni jame kopali, nego su nažalost kroz civi peljali šporkicu pod muli drito va more, pa je to i zimi i po leti vonjalo kako vrag pakleni. I evo, fala Bogu, načinli smo i novu kanalizaciju, ali i dan-danas se još čuju jadanja da i ona smrdi tamo po Banjolu i Brbatu. A ovi ča zotin barataju da duron obećuju kako će se i to rešit. Da će, tobože, sve doć pomalo na svoje. Oćo, bilo bi jako lipo da se to dogodi, boj ako se ne dogodi, unda kanlizaciju valja fermat, začepit je, a ne da i naprvo smrdi. E, ali ča unda? Kanalizacija se more fermat, ali čovika se ozad ne more začepit! A da se i more, a ki bi vrag i dal tuliko čepi!

 

Intanto, sve to gre na isti mod. Tako se i onaj vražji Panto po Gradu fali kako i un ima službu zato da bi se je moglo duperat. I zato Panto naokolo širi uvakovu parolu: Ni veloga straha, na vamin je samo da umrete, a sve drugo je naša briga! I neka znate da ima Panto i pravo. A za koga vraga smo i tu grobarsku službu učinli ako je ne ćemo duperat? I još će Panto sve za nas učint. Dodar će i onu črnu monturu obuć i prvi nosit sprida križ da čovika dopelja sve do onoga njigovoga novoga i zadnjega stanića od 2 x 2, pa šoto. Istešo ala, taj posal se mora i naplatit. Ali koga vraga će ti više i šoldi kada te Panto i njigovi va svoje ruke vazemu? 

 

Dabome, ovo je malo gruba ćakula, ali ča se more kada je i to del od našega života. Ben, ma za takove ćakule ima virmena, ni triba prešit. Pugotovo ne mladi. Zato me jako veseli kad san ovih dan šerval va Palitu na dva mesta na štantiman obišeni luli. Sezona je finila i već se mladi ženu. Neka, to je lipo i za čut i za vit. I lula i lulicu, dabome. 

 

I to je nauk koga smo odavna već žventali, pa ča drugo nego i njega triba duperat. A i mladi ljudi istešo, kada su već mladi, a ča drugo nego - neka se i oni medase ča više duperaju.

 

Pročitano 1407 puta
Josip Fafanđel

Ova e-mail adresa je zaštićena od spambota. Potrebno je omogućiti JavaScript da je vidite.

seakayakcroatia

 

Popularno

Novi oglasi

Gliser Elan
( / Auto, moto, nautika)

Gliser Elan

Ford Cmax 2016.g.
( / Auto, moto, nautika)

Ford Cmax 2016.g.

Održavanje nekretnina
( / Nekretnine, zemljišta i prostori)

Održavanje nekretnina

Posljednje teme s tužibabe

U nastavku dostavljam slijed dopisa koje sam slao komunalnom redaru, gradonačeln...
Prije 1 godinu 0 16526
Imate neki problem koji treba netko riješiti... Ne znate tko je nadležan za rješ...
Prije 3 godina 0 24519

Novo u imeniku

Web Arba

Obrt Web Arba od 2005. posluje na otoku. Bavi se servisom računala i računalne opreme, izradom…

Sea Kayak Croatia

Mala tvrtka za velike doživljaje na Jadranu!