logo mix

Rab Danas

Nezavisni internetski portal otoka Raba

×

Upozorenje

JUser: :_load: Nije moguće učitavanje korisnika sa ID: 745
Subota, 22 Prosinac 2018 12:00

Rapski kantunić Josa Fafanđela: KALENDAR

Napisao/la
Ocijeni sadržaj
(1 glas)

Bože moj, ma jesu more bit ovi naši od rapske vlasti ove godine potrošili ki šolad za štampat kalendar? To je varamente lipi nauk, ali kada čovik ima navar da svaki dan kukaju kako nimaju šoldi za ovo, oli za ono, unda bi mi bilo više drago da nisu štampali taj vražji kalendar.

 

Oštija, a pote nadimanja kada se čovik unako na miru oblaša, govoru da je jušto unda va kundotu najveći gušt još malo sedit, pa študijat i čint plani od posla. A unda je za te stvari kalendar jušto od vele potribe. Ma kuliko moremo šervat, ni zato ni vele potribe.

Oštija, a svajdi kadi korakneš samo nudu kalendari. Va svakoj novini, evo ti i kalendara, a i svaka veća firma nudi svoj kalendar. Kaledar do kalendara, sve od crkvenoga, pa priko svih mogućih sličic na njiman, sve do onih ča nan i goluškaste ženske prikažuju. Ma va zadanje virme i goluškasti muški, ne migo samo ženske.

 

Da, jušto tako, još prvije od Božića i Nove godine nudu i dilu na svakomu kantunu, pa unda i mene dopade ma celi naramak svakojakih kalendarov.

 

I ča š njiman učint? A ni druge nego unda i ja iman nauk da ih svakuder po kući nabandivan. I dabome, kadikod va kakov kantunić porivan i onoga z goluškastiman ženskamin, ma unda mi parona duron priti da će ga ona već poredit tamo kadi mu je mesto. Tobože, va vriću od smeća, a kadi drugo.

 

Inšoma, to gre navi mod: Jedan kalendar obisin va kužinu, jedan va hodnik, jedan va sobu, a unda ne moren od manjega da jednoga i va kundot ne nabandan. E da, jušto va kundot, a nego ča! Oštija, a kadi se to najviše študija i planira nego nutri va kudotu. Jedni va knudotu čitaju novine, drugi oni pravi libri, a kikod more bit i kakovo pismo od ljubavi. Ono unako zbande, dabome. Inšoma, valja reć ono ča je, tobože da je na svitu isto najviše onih ki va kundotu činu jedino one stvari ke se tamo i činu. Ma jopet, ne moru ni oni samo virit va vrata, nego ča to i oni študijaju dokli činu taj posal.

 

Oštija, a pote nadimanja kada se čovik unako na miru oblaša, govoru da je jušto unda va kundotu najveći gušt još malo sedit, pa študijat i čint plani od posla. A unda je za te stvari kalendar jušto od vele potribe. Dabome, čovik se pita; kada ću ovo, kada ću ono, pa kuliko još ima vrimena, kada su rođendani, kada je mrtviman god, kada je škuro, a kada pun misec, kada su ki blavdani i sve tako redon. Ma o svemu tomu se ne more študijat ako nimaš kalendar pridase.

 

E i jušto zato, pamet vaglavu i jedan a baren mali kalendarić valja i nutra va kundot obisit. Ali, ma ni za Boga onaj z goliman ženskamin! A ne, boj bi van ga parona mogla ne samo spravit va smeće, nego bi van još mogla i zonan starinskon drvenon laganelon zapritit.

 

E da, nisu više ni kalendari ča su jedanput bili.

 

  • Josip Fafanđel, Rab, 21.12.2018.
Pročitano 2721 puta

Ova e-mail adresa je zaštićena od spambota. Potrebno je omogućiti JavaScript da je vidite.

seakayakcroatia