logo mix

Rab Danas

Nezavisni internetski portal otoka Raba

×

Upozorenje

JUser: :_load: Nije moguće učitavanje korisnika sa ID: 745
Subota, 26 Siječanj 2019 14:05

Rapski kantunić Josa Fafanđela: RUKOMET I LENITIS

Napisao/la
Ocijeni sadržaj
(1 glas)

Ovih dan svi smo virili va rukomet. A to ni baš ni velo čudo boj, ako ćemo pravo, mi smo vajk bili dobri va tomu vražjemu rukometu, pa unda svaki put i ciljamo na velo. Oćemo bit prvi od Evrope, oli i od svita. Ma ako ne prvi, a unda brate moj, a barem drugi oli, ala šu, moremo bit i treći.

 

Kuliko bi puti ja, kada san bil mali, zalecal ploku za ćapat kosa, ali kad bi šal ploku obać latil bi onu malu pitirinicu, a ne kosa. A ja nisan zalecal ploku za ćapat pitirinu, nego za latit kosa. Zato valja ča manje drugiman trapule lecat, oli ploku isto, boj nikad neznaš ki će se podanju latit. A više puti se zna dogodit da ti ploka i prsti potuče.

Ali ove godine nan nikakor ni šlo za rukan. Dabome, kako da su se nika čuda dogajala. Mi pobjedimo boljega, a unda taj bolji zgubi od slabijega. Oli, slabiji pobjedi nas, a mi pobjedimo onoga boljega. A vidli ste ča se je dogodilo: mi smo pobjedili i onih ki su prvaci svita i onih ki su prvaci Evrope, a zgubili smo od Brazila koga su potle svi pobjeđevali. Ma to vrag nebi razumil ča se tudi dogaja. Kako je da je, na kanati smo dobro i pasali, makar se meni duron čini, da smo dobili Brazil, da smo unda mogli arivat jako visoko. E to je bil onaj brkalj za koga smo zadili, pa smo se i zanjorili i pali pokloh - i to drito na nos.

 

A svi su se potle rastrubili da nismo mi krivi zato, nego da su krivi oni ča su sudili. A ča se tudi more kada smo takovi. Nedaj Bog da bimo mi Hrvati ma ča to bili krivi! Ne, mi smo najbolji, a vajk su samo drugi krivi. I to ne samo va športu nego propijo va svemu: i va pulitici, i va pravdi, i va ratu i va poslovanju, ma va svemu su namin drugi krivi. A bilo bi bolje da se ki put popazimo i va zrcalu, a i da malo šemprije imamo navar i oni brklji na putu kih najviše sami sebi pridnoge zabijamo. Pa kad za brkalj zadineno, unda su drugi krivi,... ne migo mi!

A ki je namin kriv da sami sebi trapulu zalečemo? Oštija, a morali bi jednoga dana naučit i to da ki drugomu trapulu zaleče, lako se i sam more va nju ćapat. Lipo ona stara poslovica govori: da ki pod drugin jamu kopa - i sam va nju pada! Kuliko bi puti ja, kada san bil mali, zalecal ploku za ćapat kosa, ali kad bi šal ploku obać latil bi onu malu pitirinicu, a ne kosa. A ja nisan zalecal ploku za ćapat pitirinu, nego za latit kosa. Zato valja ča manje drugiman trapule lecat, oli ploku isto, boj nikad neznaš ki će se podanju latit. A više puti se zna dogodit da ti ploka i prsti potuče.

 

A jeste šervali da se danas na isti mod dogaja i zoviman nesrićniman bolešćinamin. Sada se, dabome, najviše spominje gripa, pa o tomu duron čitamo po novinah, oli pazimo na televiziji. I štrašu nas ala vraga i to na svaki modi. A ča je najgore svaki za to ima svoj ricet. Jedni ti svituju pirule, drugi čaj, treći med, četrti nike travine. A unda se je zotin počal falit i onaj vražji zastupnik va Saboru - tobože Pernar. Un nas je unako po svoju svitoval da ćemo sve bolešćine prebolit, ako samo budemo pili ćikaricu materinoga mlika i ako nutra stavimo zeru C vitamina. E, ali ča se je dogodilo? Par dan ni njega čut na telviziji, a unda se je jedan dan javil, pa je rekal da ga ni bilo zato boj da je i un dobil gripu. Slabo mu je pomogla njigova riceta od mlika i C vitamina. A meni se pari da je i un zonan svojan saborskon plaćon isto obolil samo od lenitisa, kako i puno njih va Saboru.

 

Tako da je i jedan likar pacijentu govoril da boluje od lenitisa. A un mu se je unda požalil da neka mu ne govori o belestima po latiski, boj da un to ne razumi, nego neka mu reče lipo po našu. A likar da mu nato govori: E unda uvako- vi dragi moj bolujete samo od vele lenosti! Doktore, govori un njemu, ala, ma isto mi to sada recite i po latinski, da moren reć i ženi od čega bolujen...

 

  • Napisal: Joso Fafanđel, 25.1.2019.
Pročitano 2603 puta

Ova e-mail adresa je zaštićena od spambota. Potrebno je omogućiti JavaScript da je vidite.

seakayakcroatia