logo mix

Rab Danas

Nezavisni internetski portal otoka Raba

×

Upozorenje

JUser: :_load: Nije moguće učitavanje korisnika sa ID: 745
Petak, 08 Veljača 2019 15:31

Rapski kantunić Josa Fafanđela: KANDALORA, ZIMA HORA

Napisao/la
Ocijeni sadržaj
(1 glas)
Rapski kantunić Josa Fafanđela: KANDALORA, ZIMA HORA Foto: Hrvoje Hodak

Pametin kako bi va ovo doba godine moja pokojna baba namin dičini pivala uvakovu pismicu: Kandalora, zima hora - snig do mora. A va ovo novo vrime pametin kako bi tu pismicu isto na prognozi vrimena pival i pokojni Sijerković, ali bi još nadodal: Rekal je sveti Blaž, da je to laž.

 

E, ma ja ću pivat i svoju. Va oviman pasaniman šetemanamin bilo je kod nas na Rabu puno sunca, pa su unda i dani bili tepli. A dočim je va ovomu štajunu tepal i lipi dan unda ja iman jednako lipi nauk, da vani na dvoru, na jednoj lipoj derinici, seden na velu letnju katridu i teplin se na suncu.

- Meditiraš!, reče mi moj sused. Ali ča se je dogodilo? Ukoži mene jedan moj lipi mladi mačak, ki još ne teče po ženskamin, pa ni dvi-ni tri, nego skoči un meni gori na kolena. Ja san bil zatvoril oči na suncu pa san ga se diboto i prestrašil. Ali pustil san ja njega neka legne i neka mi grije koleno. I unako ljudi govoru da maška liči svako bolesno mesto kada na njemu leži.

Latila me je volja pa san malo z rukan i pogladil toga moga maška i ukožih ja kako mi od ruke letu njigove dlake naokolo. Jopet san pasal z rukon priko njega, sve od glave, priko ušiju, pa do repa, i je - od maška padaju dlake. I evo ti prognoze vrimena, mislin se ja. Boj, kada gre zima unda se maške i druge beštije ke imaju dlake obučuju za zimu, raste in veća dlaka, pa se činu i duplo deblji nego ča su bili prvije. E, ali kada zima pasiva unda oni jopet minjaju svoju dlaku. Ona zimska pada, a šoto raste ona manja letnja. I to san van otil reć, tobože, da po tomu sinjalu nebi više tribalo bit vele mrzlinje. Ne, nego će ju pomalo arivat sve tepliji i tepliji dani. 

 

Ali ni to sve. Istoga dana potle ubeda čujen ja va gušću kako kos piva. Da, piva - ma ne onu zimsku štišnjenu pismu, nego onu pravu, veselu prolićnu. I jopet ja govorin sam sobon: evo ti ga na, ovo je i drugi sinjal za prognozu vrimena. Ako maški pada dlaka, a kos piva prolićnu pismu, unda oni skupa navišćuju da više neće bit mrzlinje i da će proliće vreda arivat.

Ala da mi to ne virujete? A unda se lipo strpimo, čekajmo i duron imimo navar ki je imil pravo: mrzla Kandalora, oli onaj tepal sveti Blaž.

Pročitano 1880 puta

Ova e-mail adresa je zaštićena od spambota. Potrebno je omogućiti JavaScript da je vidite.

seakayakcroatia