logo mix

Rab Danas

Nezavisni internetski portal otoka Raba

Petak, 06 Rujan 2019 11:23

Rapski kantunić Josa Fafanđela: DVI STVARI

Napisao/la Josip Fafanđel
Ocijeni sadržaj
(1 glas)

Da, dvi stvari nan se va ovomu štajunu dogajaju. Dvi novitade, oli dvi promine. Prva promina su naši školanti. Prvidan, deveti devetoga, otvaraju se škole i dica će ju se po njiman razltetit. Ne samo ovi mići i oni malo veći domaći školanti, nego i oni malo stariji ki će nan se rasteć po školamin i zvan Raba.

 

A evo, i vrime je malo puklo i ni više teplo kako je do sada bilo. Inšoma, sve se više, pa makar i pomalo va žrna od promin zamoćujemo. Vrime se minja i navišćuje jesen, gosti i školanti nan pomalo gredu ća, a ova naša dičina ča ostaju sada će pol dana bit doma, a pol va školamin.

 

Jušto pasane šetemane gren do moje butige po provištu, pa san ze zamišal va dicu ka teku z biciklamin simo tamo, i na onima rošulamin i romobiliman se trkaju, jušto kako da oćeju na silu još ovo malo vrimena od školskoga odmora skoristit. A ja san se učinil šordav, pa ih pitan:

- Dica, a kada ono škola počimlje? A oni su zabrenzali i razletili su se kolo mene, pa mi jedni odgovaraju da škola počimlje osmoga, a drugi da devetoga.

- Ma ni osmoga, ljuti se jedna mića mala, boj osmoga je nedilja i Mala Gospa, a škola nan počimlje devetoga, prvidan potle nedilje!

- E to je već bolje, govori nato jedan diško, a ča se mene tiče more počat i desetoga, a petnajstoga bi još bilo i najbolje! Da dica su se tuliko naučila na igru, po lipomu vrimenu, da in se sada baš i ne gre va škole se zaklapat. A ja ih razumin i zato ću jopet reć da ki vrag tira ove naše vlasti da dicu tako rano va škole zatvaraju. Ali to ni moj posal, nego kako su odredili tako će i bit.

 

Da, a ona druga stvar je Mala Gospa. Loparski je to blavdan, a od vajk su ga i svi Rabljani poštivali. Bila je, a i danas je ostala užanca da za Malu Gospu triba poć Lopar. Jedni poradi onoga njihovoga veloga sajma, a drugi i poradi mise i sajma. A prvije je bila još jedna lipa užanca, a to je da su se i fameje medase kumpanjale. Recimo Dražani bi na Malu Gospu šli kod nike fameje lopari na ubed, a ta fameja bi za blavdan od Petrove došla kod njih doma na ubed.

 

Ben, ma svi su najviše volili onaj njihov veli sajam ki i dan-danas dura, na komu bi se moglo kupit ča to za domaću potribu, recimo šmur, motiku, oli postole gumenjače.

A povidal mi je jedan Loparanin kako je na Malu Gospu i jedan Ličanin držal banak na komu je sve moguće šuškarije prodaval. Kad dojde do njega jedna mlada Loparka i pazi ona po banku oće kadi šervat onaj mali škartočić od črva, onoga praška za robu oli bičve očrvit. Ni ga mogla šervat, pa da pita ona toga Ličanina:

Barba, a imate vi more bit črva?

Ličanin da se je malo va nju zagledal, počal se je unako muški smijat, pa da je govori:

- A vid ti vraga! A di si bila dok san ima črva? Lipa moja, sad imam samo - črvića!

 

Joso Fafanđel za Kanturnić, 6.9.2019.

Pročitano 1438 puta

seakayakcroatia