logo mix

Rab Danas

Nezavisni internetski portal otoka Raba

Ponedjeljak, 28 Listopad 2019 08:41

Rapski kantunić Josa Fafanđela: VATROGASCI

Napisao/la Josip Fafanđel
Ocijeni sadržaj
(3 glasa/-ova)
Rapski kantunić Josa Fafanđela: VATROGASCI Ilustracija: Damir Gebauer

Jušto kako i svake godine i ovoga puta da su ovih dan naši vatrogasci bili na onomu njihovomu redovitomu izletu - z brodiman. I neka su! Boj ako je ki to zamerital oni sigurno jesu. Toj našoj kumpaniji se vajk i duron moramo i poklanjat ako triba.

 

Da, boj oni se zovu dobrovoljno vatrogasno društvo, a to pari da sviman namin gredu napomoć dobre volje, a ne za veli šoldi. A toga je danas jako malo, nažalost, tobože da se takovi vridni i važni posli činu dobre volje. Danas svaki vrag samo šodli išće. Eto i zato našiman vatrogasciman svaka čast, a da ne spominjen ono ča i po mrzlinji i po veloj vrućini spretno teku borit se i z maliman i z veliman ognjiman. Da, da - i spretno i brzo, zato kod nas i ni do sada bilo veloga požara. Fala najprvo njiman, a unda poželimo da tako i naprvo bude.

 

A kuliko oni na prešu skaču na požari govori i jedna ka se je Banjoli dogodila. Tobože, da je jedna baba Banjoli šla po noći van na dvor, pa da je gori na vrhu Tinjaroše, oli Kamenjaka, šervala črljeno nebo.

 

Prestrašila se jadna i vreda je zvala vatrogasci, a Pavica ki je bil dežuran, na prešu da je poslal gori na vrh jedan auto i jedna navalna kola. Ali kada su oni arivali na vrh Tinjaroše ni bilo za vit nikakovoga ognja, nego da je zgor Velebita jušto hodil van veli i unako črljeno-žuti micec. I dabome, potle toga da su in se vrazi i rugali.

Govorilo se je da su naši vatrogasci tuliko naprešni i brzi, da ki put znaju teć... i misec gasit.

 

A valja reć i to, da na timan njihoviman izletiman z brodiman oni ne činu samo spaši nego zausput i par kašet ribe znaju ćapat. A ranijih godin i par kašet liganj.

Dočim su se ovih dan tornali doma pitan ja dva od njih da kuliko su ovoga puta latili ribe, a najviše da kulko je bilo liganj? A Sven mi govori da neka oni govoru ča ih je volja, ali un da je na jednomu mestu digal najmanje pol kašete. I to lipih liganj.

- A oni drugi, kuliko su oni ćapali?, pitan ja jopet.

A onaj drugi mi nato govori uvako:

- A ćapali bi oni i liganj i arbuni, ali najviše da se volu šanka ćapivat.

A unda ni druge, nego do godine valja kaparat oni brodi ki nimaju šanka. Ma jopet, mislin se ja, bolje da je uvako, boj kakovi su to vatrogasci ki znaju i veli ognji gasit, a duron su žajni - boj ne umu svoju žaj ogaševat! I zato, nazdravlje i živili!

 

Joso Fafanđel za Kanturnić, 25.10.2019.

Pročitano 635 puta

seakayakcroatia