Foto: RabDanas
Istešo, moremo se mi kolo toga sulacat kuliko nas je volja, ali isto sve ovo ne trači jako na dobro. Virus je virus, ma ako je nepoznat i nima lika kuntra njemu unda je isto sve to malo za ne bit jako kuntenat. A da ne govorin kako je i Italija jako blizu nas, na susestvu bi se reklo, a tamo kuliko se čuje taj virus jako grubo navaljuje. Zato je isto pametno držat se onoga ča nan naši stručnjaci priporučuju. A najvažnije je ča manje putovat, a ča više stat doma i ruke prat.
Ovih dan i moga suseda zove žena od Rike, boj tobože da je virus već va Riki, i da neka se zato čuva, boj da ni više mlad, a ta saita od korone da najviše voli jušto stariji ljudi. Najprvo, govori un njoj, do mene virus neće boj san ja na školju, priko mora i gori na vrh briga. A drugo, fala Bogu da baren ki ta manje drži do mladoga, a više voli staroga čovika. Da ni ta korona zarazna, a diboto bi je zato i bušnul.
A kada već spominjen bušnjade unda se evo dogaja da se je ovih dan va kalendar petal i Osmi mart, tobože, dan od ženskih. I ča sad? Ala da ćemo i to morat debandat i dricat ća sva i ženska i muška slavlja. A unda i ljubav, ča je najgore od svega. A ki bi va ovomu vrimenu od virusa bil tuliko njorant da još i ženske bušnjuje. Ma ni svoju, a kamo li tuje! Niš od toga. Ako se ženskon ili z muškin rukuješ vreda nas avizivaju da moramo potle dobro ruke oprat. A bušnjevanje je još i gore od rukovanja. A kakov je to unda gušt kada bušneš žensku, pa unda moraš poć tekuć na špinu vreda usta oprat. Bolje se je unda i ne bušnjevat. I unako govoru da se moramo držat dalje jedni od drugih.
Ma jopet, sve se meni pari da će namin muškiman ovaj strah od virusa jako poć za rukan. Da i to jušto danas na dan od Osmoga marta. A ki će ženu oli divojku peljat van na vičeru kada svi govoru da se valja ča više jedan od drugoga dricivat. Jednako tako ako ženi i cvetić daruješ na isti mod se more reć: Ženo, skužaj ali bušnut te neću boj nedaju poradi onoga virusa! Dabome, a žena će isto na svoj mod odgovorit: A našal si ti skužu, našal! Jušto ti je dobro došlo, nebojse!
Dabome, to je tako, arivalo je vrime od ravnopravnosti pa se i ženske znaju šemprije na muški račun narugat, ali muški se nedaju pa oćeju i va tomu poslu vajk bit prviji.
Evo povidali su mi kako se je jedan, ma jušto na dan od Osmoga marta, malo napil, pa je na putu za doma zausput šal va mesnicu kupit kilo mesa za ubrok. A nutri ni bilo mesara nego je za pulton, unako va belo obučena, bila lipa mlada ženskica. Pa pita un nju: A imaš ti lipa moja kokošje noge? Ona mu govori da ima. A imaš more bit kokošja prsa?, pita jopet un. Iman, govori ona njemu. A kokošji vrat? Iman i kokošji vrat, nego ča! A un se je unako malo zalelal, pa da je govori: E lipa moja, ti ćeš se jako teško oženit!
Joso Fafanđel za Kantunić, 8.03.2020.
