Home Beseda po domaću Rapski kantunić Josa Fafanđela: GRINCH I TRI KRALJA

Rapski kantunić Josa Fafanđela: GRINCH I TRI KRALJA

0
Rapski kantunić Josa Fafanđela: GRINCH I TRI KRALJA

Foto: Foto: Hrvoje Hodak

 A va Dorki ne samo da su žaruljice na mestu, nego su i jaslice već našestane. Božja obitelj, štalica, slamica, i ona znana tri kralja: Melkior, Baltazar i Gašpar. A šerval san da ozad va suhoj travini leži i mladi janjčić. Stisal se je i muči. Oštija, skrutit će se, boj ovoga puta se je jako zaran skotil.

 

Rab danas oglas

Ča ne vidiš da nesrića od korone najviše špija jušto nas malo stariji. Ali ja se ne dan, boj ne gren Grad zato da iden lumpat s kumpanijon oli, nedaj Bože, s kurbinamin se kumpanjat, nego gren malo obać ča je novoga, čase dogaja. A i držin se najviše sam.

 

I evo me jopet na Novoj rivi kod mojih golubov, gledan ih kako veselo zoblju ono malo zrnja ča in donesen, pa unda ala, da malo pošpijan ča je nutri va Dorki novoga. A novoga je puno, boj ne samo da su žaruljice na mestu, nego su i jaslice već našestane. Božja obitelj, štalica, slamica, i ona znana tri kralja: Melkior, Baltazar i Gašpar. A šerval san da ozad va suhoj travini leži i mladi janjčić. Stisal se je i muči. Oštija, skrutit će se, boj ovoga puta se je jako zaran skotil.

Ala šu, ma sve je to lipo za vit, kako i svake jaslice, jedino ča mi se pari da su ona tri kralja ovoga puta velu bariškadu pasali. Kako da se nisu rivali kroz golu pustinju da bi arivali do štalice, nego kroz gušć pun dračja, kupine i jarike. Ne, ne rugan se, nego ako idete tamo šervajte malo kako je jednomu od njih (a to bi mogal bit Gašpar), kako mu je ozad rasparana ona duga halja na hilu.

Dabome, sve je moguće, ali ja bi prije rekal, da su ga to oni od Dundova na kakovu brukvu polegli. Ma jopet, ala da Dundovo nima ni iglu, ni dva pedlja konca za to malo zakrpat? Boj grubo je brate za vit kralja va rasparanoj halji.

 

Ja san kuntenat ča se je na Rabu našla jedna pametna ženska kumpanija, ka je umila prepoznat tu ćakulu o Grinchu i sve to stavit na naš trg i va naši blavdani. Božić je na pragu, a bolešćina od korone oće ga na svaki modi ukrast. Ma svaka čast, hitan kapu doli, i sve pofale za dobru ideju. Da ne rečen kako bi tomu zločestomu Grinču još samo tribalo stavit trubicu priko onih grubih črnih ust. Da, neka i un nosi masku. Oli ne, ma bolje ne, pa će za ki dan i un morat platit kaznu od 500 kun. 

 A potle jaslic, a Bože moj, nisan mogal od manjega ne zavirit malo i do onoga trga prid bivšu općinu. Kako prvo, šerval san da su i tamo digli onaj veli bor, a kako drugo, vidin od daleka da se uz bor šulja va črljeno obučena jedna peršona i nosi velu vriću zada na hilu. Gren još bližje i unda mi je tekar sve bilo ćaro. Boj, prije par dan čitan ja va novinah da je Rab pod bor dobil i Grincha.

A znate ki je to Grinch? Grinch je peršona va jenomu libru ki se jušto tako i zove, tobože, “Kako je Grinch ukral Božić”. Ali va toj štoriji je i jedna divojčica ka je tuliko dobra i blažena da će ga morebit nagovorit da ne ukrade Božić, makar je Grinch tuliko zločest da mu je jedina želja da to učin i- jušto to – da ukrade Božić. Dabome, lipa je to ćakula za ovi naši dani, ali ja san još više kuntenat ča se je na Rabu našla jedna pametna ženska kumpanija, ka je umila prepoznat tu ćakulu o Grinchu i sve to stavit na naš trg i va naši blavdani.

Da, boj jušto se to i dogaja, Božić je na pragu, a bolešćina od korone oće ga na svaki modi ukrast. Ma svaka čast, hitan kapu doli, i sve pofale za dobru ideju. Da ne rečen kako bi tomu zločestomu Grinču još samo tribalo stavit trubicu priko onih grubih črnih ust. Da, neka i un nosi masku. Oli ne, ma bolje ne, pa će za ki dan i un morat platit kaznu od 500 kun.

 

Gren ovih dan jopet Grad, pa san hata pošta šal pošpijat je ta nesrića od lupeža još tamo. Je, tamo je, još ni ukral Božić, ali vidin ja nikakor se je stabelo ćapal za onu velu klupu uza borić. A ni to ni velo čudo, boj već par dan tamo puše velo jugo, pa ga more obalit. Oli to, oli je popil par žmulji priko mere. A ki je nesrići i dal pit kada su svi kafići na Rabu zatvoreni?

Nato mi govori jedan: Jo šordo moj, a ča ti ne znaš da je ovih dan bil i sveti Mikula na Rabu, pa je lupežina i njemu od rusaka dvi botilje zgulil.

Ma neka loče, govorin ja sam sobon, samo neka nan Božić ostavi na miru. Po celoj državi kradu se veli šoldi, pa sad još samo triba i Božić ukrast.

 

 

Joso Fafanđel za Kantunić, 09.12.2020.

 

 

 

 

 

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime