Foto: Fotografija Miroslava Maroevića iz arhive Josipa Andrića
Da, svi željno čekamo da nan se gosti tornaju, da leto bude ono ča je vajk bilo, da smo va normalnomu životu. Da se bez straha kupamo, družimo, mrzlu pivu popijemo, oli sladoled guštamo. Pa ako leto bude normalno nemojmo se ni na vrućinu bunit. Trpimo i veselimo se letu bez straha.
Da, nadan se da će ovaj lipi štajun od prolića učint svoje. Ma na dobro, dabome. A još samo da čujemo prvoga črška i unda ćemo se za leto parićat. Do Petrove na jedan mod, a potle Petrove na drugi mod.
Da, svi željno čekamo da nan se gosti tornaju, da leto bude ono ča je vajk bilo, da smo va normalnomu životu. Da se bez straha kupamo, družimo, mrzlu pivu popijemo, oli sladoled guštamo. Pa ako leto bude normalno nemojmo se ni na vrućinu bunit. Trpimo i veselimo se letu bez straha.
A znate već i sami ča doktori govoru? Kad je vruće, da ne gre ni pivica ni sladoled, nego da valja teploga čaja popit. Da, da, čaj i to tepal! Je varamente, ima likar pravo, more zazbilja bit da je tako. Ma kako bi znal reć moj sused i prijatelj, pokojni Šime: Mene nikakor na čaj drob zaboli. Lovi me matrina pa ni druge nego moran va čaj hitit i bićirin rakije... E, unda da se laglje more popit, a i štumak da će se manje bunit.
Eto, a diboto da je ta nesrićna rakija jušto kako medicina. Dočim te niki vrag stisne govoru: Popij jednu oli dvi mrzle rakijice! Ako su vas križa presikla, triba z rakijon masirat. Ako zub zabol i- jopet na njega rakiju. Ako se posičeš, valja z rakijon polit. Ako ti se rana poledila, jopet reku: Samo ti to dobro va rakiji operi! Dabome, pa unda rakija malo z vana, a malo i znutra. A bože moj! Oštija, a pametin ja va susestvu jednu staru babu, ka je nažalost već odavna pokojna, a i ona je imila užancu, dočim bi se na iglu nabola, vreda trk na bočicu od rakije. Unda bi malo zlila po prstu, a jedan dobar gut bi i va sebe putegnula. Mi bimo je unda pitali:
– A zač tako, baba? A ona bi samo znala reć: A dica moja, triba vajk ne samo zvana nego malo i znutra namazat!
A ljudi su po seliman imili pune konobe i vina i rakije i to sve od prve klase. Ma isto je bil nauk poć malo do Grada, najviše poradi kakove potribe, pa unda guštat i onu drugu potribu, tobože, poć kod Taribe na gulaš, pa i tamo putegnut žmulj vina, oli bićirin rakije. Dabome, va to nidanje staro vrime su i mladići volili malo po leti do Grada skočit. Lipo se obuć, vlasi zalizat pa pješke Grad. Jedna lipa štorija jušto i o tomu govori. Inšoma, jedan mladić unako mlad i goluz parićal se je, obukal je beli veštid, namazal je valasi z uljen, zalizal se je i nagori začešal, vas se je lipo uredil i partil je pomalo kuntra Gradu. A gori, zgor puta na jednomu dvoru sedil je va hladu jedan stari domaći ćovik i sve je to imil navar. I dočim je mladić arival po putu šoto dvora, pita taj ded njega ozgora: A kaj greš, mali?
A mladić je dabome bil ohol i pun sebe, pa se ni njanci okrenul nego mu je ozdola odgovoril: Gren vraže stari Grad – prčit! A nato će njemu ded, unako s pol glasa: A hodi, hodilipo ti je rilo!
Evo, latil san se malo prolića a malo i leta. A va tkovomu smo štajunu. Proliće nan dura, a leta smo željni, unako na mod slobode, bez straha od bolešćin. I šaldo se nadan da će nan takovo leto ovoga puta i arivat. A još malo pa ćemo i to vit.
E, a do unda bi se tribala još i naša nova vlast na Rabu, oli bolje reć va Gradu Rabu, posložit. Potle izborov znamo ki je gradonačelnik, a znamo i ki su novi vijećnici va Graskomu vijeću. E, ali neznamo ki će bit glavni od Graskoga vijeća, ča oće reć presjednik. A ni brate ni čudo da se još ne zna, boj kako ča smo vidili oni skupa od opozicije sada imaju više vijećnika nego HDZ. HDZ ima 6, a oni drugi 7, pa računan da je komanda za birat presjednika Vijeća va njihoviman rukamin. Ben, ma već se okolo čuju ćakule, da će ki ta od onih sedan poć kako žetončić va jato od HDZ-eja. Po domaću, se to unako grubo reče, da će se jedan prodat. A nebi bilo lipo, boj ako smo tako odlučili, unda neka tako i bude. Z jedne bande vlast je va rukamin od gradonačenika, a z druge, vlast je va rukamin i od Graskoga vijeća. A bit će zato gušt imit navar naki mod će to kurit, ta kohabitacija, kako se to reče. A to je va niku ruku i pošteno, da jedni drugih moru kuntrolirat i imit navar. Ali ni pošteno izdat birači i prodat se na drugu bandu. O tomu san jušto jedan lipi citat našal na internetu. Čovik govori uvako: Ki put, potle razgovora z pojediniman ljudiman, čoviku dojde potriba da prijteljski pomiluje sten, nasmije se stablu, a da s puno poštovanja i kapu skine kada kuntra tovara
Joso Fafanđel za Kantunić, 11.06.2021.
