Foto: Foto: Josip Fafanđel
Jušto ovaj misec prosinac kako da smo se svi najviše ufali ne va prošnju, nego va dari od svetoga Mikule i Deda mraza, oli Božićnjaka, kako ga već ki zove. Pametno, boj zač prosit, kada nas oni dobre volje oćeju darovat… I tako je jušto i bilo.
Da, pasiva još jedna godina, oću reć, kuri evo i ovaj zadnji misec, misec dvanajsti ki je pun trošenja, blavdanov i svakojakih kupovanja i darovanja.
Inšoma, zato se ja malo mislin i pitan da ki je vrag i zač jušto ovaj misec krstil da se zove prosinac. Ala šu, za jedanajsti misec mi je sve ćaro zač su ga nazvali studeni. Malo je mrzliji pa bimo ga mi po domaću mogli krstit i mrzleni misto studeni. Oli još bolje daževni, pa bi unda ovaj dvanajsti mogal bit mrzleni. Ali eto, ne nego prosinac.
Oštija, a i ni baš da nan va državi teku samo med i mliko, ali pari mi se da baren mi na Rabu još nismo arivali do toga da svi moramo prosit. Istešo, ni oni gori, a ni ovi naši na Rabu, ne daju nan nikoga veloga kuraja, ali eto, jušto ovaj misec kako da smo se svi najviše ufali ne va prošnju, nego va dari od svetoga Mikule i Deda mraza, oli Božićnjaka, kako ga već ki zove. Pametno, boj zač prosit, kada nas oni dobre volje oćeju darovat… I tako je jušto i bilo.
Inšoma, sv. Mikula je bil na Rabu, ali je odavna već pomalo i šal ća. A ovih dan da će i Ded Mraz, oli Božičnjak, arivat. I dabome, dokli se sveti Miklula ne boji mora, govoru da se Ded Mraz boji i to jako.
Dabome, un je rođen gori va snigu i ledu pa se okolo govori da ne umi ni plavat. I zato i na Rab najviše voli arivat z reoplanon, pa se unda s padobranon tumba doli na Novu rivu. Ma ja se ne pačan va njigov posal, ali mene bi isto bilo manje strah putovat na Rab s trajekton, nego se doli s padobranon tumbivat. A more se i katamarana domislit. Ali ne, nego reoplan i to mali.
A znate ča je unda meni palo napamet? Palo mi je napamet da je more bit i Ded Mraz svake godine sve siromašniji, a još najviše i škrtiji. Oštija, a ni to ni za čudit se, mora i njega ona vražja kriza jedanput agvantat. Ča oću reć? Oću reć: ako na Rab ariva priko trajekta, oli s katamaranon, unda mora sobon i velo brime dari nosit. A navi mod, ako gre doli s padobranon, unda ne mora. A i ne more nego samo jedan mali torbak hitit priko ramena.
A ča se tude more, sve mi se pari da i oni va zadnje vrime moraju bit jako šparinjuzi. Ona vražja kriza i Deda Mraza osiromašuje, ne migo samo nas. Da, ni više ni Ded Mraz ono ča je jedanput bil! Altroke naši pulitičari i naši zastupnici! Oni z lahke ruke putežu vele plaće i dižu ih kako ih je volja. I ne pojidaju se brate njanci malo da su to naši šoldi i da smo svi mi njiman jedan veli Ded Mraz, ki ih obilato daruje.
I ča nato još reć nego, ala šu – sretni van blavdani!
Joso Fafanđel – za Kantunić (20.12.2022.)
