logo mix

Rab Danas

Nezavisni internetski portal otoka Raba

×

Upozorenje

JUser: :_load: Nije moguće učitavanje korisnika sa ID: 745

E, rekal bi diboto uvako: kada puno puti piliš po jednomu, unda se reče da si već i Bogu i vragu dodijal.

Objavljeno u Beseda po domaću

Ovo san odavna već zapisal, pa ću i ovoga puta spomenut. Dabome, va ono staro vrime najgore su za Križevu pasivali Loparani, boj oni su najviše morali nanoge hodit; sve od Lopara, pu unda gori priko Fruge, oli Kanta, šoto krospolje, priko svetoga Ilije, pa Paliton do Grada. A tako i nazad varamente, bilo lipo vrime kako ove godine, oli dažilo, ča bi se isto znalo dogajat. To pari da su Loparani bili s celoga dana po putu i Gradu. A kada je čovik s celoga dana na putu unda valja ča to i poist i popit.

Objavljeno u Beseda po domaću

Virovali oli ne, ali evo - va strahu san! Gren ja niki dan po ovomu lipomu vrimenu malo va moj gušć prošetat, a zausput more bit i ku šparugu nać, kad vidin ja na putu, va meliću nike čape. Vidin jedne, ali to je sled od nikoga veloga pasa. A jedan moj sused ima pasa, pa ga i un zna ki put malo prošetat da se blago po gušću raštrče. Da, to su čape od njigovoga pasa, a vidu se i čape od čovika ki je s pason hodil. Sve je to lipo, ali vidin ja i nike druge čape va melu. Ne, to nisu pasje. Kalan se bližje i gledan bolje, a ono kako da je vela ovca oli koza pasala po putu. Ben ma, mislin se ja, niki više ude kolo mene nima ni ovce, a kamo kozu. I nećete mi virovat, ali vreda mi je lupilo va glavu da su to čape i sledi od - dibljega prasca!

Objavljeno u Beseda po domaću

Da, i Vazan je pasal pa sada valja imit navar ča će se naprvo dogajat. Kuliko moremo pametit, prije vazma se je ludovalo kolo one vražje Instanbulske konvencije, ka bi tribala dat još veća prava ženskamin, oli bolje reć, ka bi ih tribala čuvat da ne zgubu i ono pravo ko su do sada malo po malo škapulale.

Objavljeno u Beseda po domaću

Ovih dan kuntrivan jednoga na butigi, pa ga pitan da ako gre ki put namore i da ča je, kakovo je stanje, lati se ča? A un me je samo pogledal, pa mi vreda, ma jako na skarso govori: Stoj smiron - bolje je stat doma! Tobože da lati va zadnje vrime jedoga molića, ali da je zato ljut kako ona najljuća paprika. I to zato, boj da više ne more kupit onu nesrićnu dozvolu za ribu lovit.

Objavljeno u Beseda po domaću

Ovo vrime ko nas je ovih dan zateklo govori kako je najbolje lipo stat doma, ložit oganj i teplit se. A ča ćemo čint va kući neka svaki bira za sebe. Puno od njih čujen kako znaju reć da je njiman najgore kada je grubo vrime pa ne moru s kuće van. A grubo je vrime ne samo kada je mokro i daži, nego je još više grubo kada bura puše, a unda još uzato i ruke i uši zebu. Ako mene pitate meni ki put i dobro dojde da ne moran poć s kuće van, boj ja i va kući iman posla da ga ni triba puno iskat. Ma ako ga ki put i ne moren nać, ni straha, nać će ga već moja parona i to vreda, za ajn-cvaj.

Objavljeno u Beseda po domaću

Balanje z rukamin - oću reć rukomet. A naki mod se je sve to ovih dan dogajalo, sve mi se pari da se je i to pretvorilo va jednu velu bolešćinu. Boj mi znamo navijat i navijat, rastezat laštrik i mihuri pumpat, i to na mod da na kanati sve to mora puknut, a ča drugo! Puna je televizija ne samo rukometa, nego jušto još i više toga vražjega navijanja. I to na mod da smo mi vajk najbolji, da ćemo mi bit prvi i niki drugi.

Objavljeno u Beseda po domaću

A tako van je to, na žalost. Danas čovika puno toga more i na pod i va postilju obalit. Starijega dabome, boj druga je stvar kada mladi ljudi va postilju padu. To njih med kućete ne obaljuje nikakova bolešćina nego ona lipa potriba ku dodar i maške ćutu va ovomu štajunu od godine.

Objavljeno u Beseda po domaću

Mrzli su dani, štajun je od zime, a meni se čini kako se ovih dan sve manje govori o gripi. Zadnji put su spominjali tu bolešćinu ono kada je nestalo špunti za cipat se kuntra nje, pa ki se je cipal - cipal se je. A ja se do sada nisan nikad cipal, a moj sused ki je već bližje osandesetoj nego sedandesetoj, isto mi govori da se ni un ni nikad cipal, pa da neće brate ni sada.

Objavljeno u Beseda po domaću

A ki već nezna da su jušto na dan trinajstoga ovoga putnici za Rab, zasvin autobuson, ostali va Stinici. Partili su jutro za Rab i dočim su pasali Senj kalala se je na njih ona gruba škura bura.

Objavljeno u Beseda po domaću
Stranica 4 od 5

seakayakcroatia