Inšoma, jopet nan je lipo vrime arivalo, a i naša Fjera je unako boležljiva i šepava nikakor pasala. Ben, ma leto još dura, gosti arivaju kuliko je to moguće, s trubicamin se borimo kuntra virusa, moremo se kupat i tanko obučevat, moremo spat i va kući i po vanu, moremo mrzlu pivu popit, i sve takove lipe stvari, da i ono drugo ne nabrajan.
Inšoma, ča se korone tiče vidite i sami ča se dogaja. Svi strahuju da i neće puno kalivat, nego da bi mogla bit sve jača i jača. I sada su nan sviman nabandali one vražje trubice, kroz ke varamente moremo dihat, ali mi se svako to malo orćali zamagljuju, pa ih duron taren, a to pari da ni oni nećeju dugo durat. I tako zaman govoru, da trubica ni skupa. Oštija, trubica ni ma su zato orćali ala vraga skupi.
Inšoma, kako je da je, puno je vrimena proteklo va strahu ono kada smo s trubicamin na ustiman tekli po butigamin i svajdi naokolo. I evo ga na, pasali smo već i polovicu od šejstoga miseca, a ni daleko ni ovgodišnji blavdan od Petrove. Pa se pitan - kadi smo i ča smo? Ma intanto, kako da pomalo sve gre va svoju regulu.
Ma kadi smo i ča smo? Vidimo se, čujemo, oli kumpanjamo? A vrag će ga i znat kadi smo i ča smo, kad se slabo vidimo, a još manje kumpanjamo.
Čovik kako da vajk mora bit va nikomu strahu. Ovoga puta je to onaj nesrićni korona virus. Ma jopet, jedni govoru kako je sve to samo malo priko mere napuhano i da je taj vražji virus niš drugo nego kako i svaki drugi. Recimo kako i gripa. I jušto se moramo i pitat da ča je zoton vražjon gripon? Niki o njoj sada ne govori ma njanci jedne jedine besede. Kako da je ni, kako da je zasvin nestala i kako da se je i ona prestrašila ovoga novoga virusa. Da i nju ne zatare, pa do godine ni nje više ne bude. A ki zna, sve je moguće.
Blavdani su pasali, izbori su pasali i ja razumin da smo se zotin malo i spuhali i zimorili. To pari da je arivalo vrime kada bi se sada valjalo malo i latit kakovoga posla. Oli ćemo još i maškari čekat pa ćemo unda! A neka, i to je lipo. Jedino da va svemu i malo miru ne prepasamo.
I evo ga, dočim smo va dvanajsti misec zakoračili, valja računat da smo i na kanatu od godine arivali. Jedni ga ga zovu decembar, a po hrvašku je prosinac. I jušto to mi ni ćaro. Ma svake godine dočim se ovaj zadnji misec va godini začme, ja se vajk zapitan, tobože, da ki vrag mu je i dal takovo ime.
Evo i ova gruba vrimena najavljuju da se pomalo i va zimu zatvaramo. Gosti više ni za vit, masline su pobrane, ulje je učinjeno, a na dan jedanajstoga od ovoga miseca moglo se je čut da je i dosta vina po konobah pretočeno.
Jušto kako i svake godine i ovoga puta da su ovih dan naši vatrogasci bili na onomu njihovomu redovitomu izletu - z brodiman. I neka su! Boj ako je ki to zamerital oni sigurno jesu. Toj našoj kumpaniji se vajk i duron moramo i poklanjat ako triba.
A Bože moj, ono ča čovika va ovo doba godine more veselit to je najprvo lipo vrime, ovi burini od jeseni ki nan daju ćaro nebo i puno teploga sunca.
