Parićivan ja ovih dan onu emisiju Dvi-tri po domaću, zapišujen kako san priko poruke pital boležljivoga prijatelja, je more bit ča bolje oli ni, a unda san potle toga nabandal onu pismu od naše kumpanije Tići, ka piva o fažoliću loparčiću.
Inšoma, mislin se ja, kako bi bilo jako lipo na kanati od svake godine učint i niku sortu od inventure. Oštija, a bilo bi lipo pobrojit ča smo to akvištali va pasanoj godini. Ma jopet, nebi valjalo zaburavit sinjat i sve ono ča smo grišili i žbaljivali.
Bože moj, ma jesu more bit ovi naši od rapske vlasti ove godine potrošili ki šolad za štampat kalendar? To je varamente lipi nauk, ali kada čovik ima navar da svaki dan kukaju kako nimaju šoldi za ovo, oli za ono, unda bi mi bilo više drago da nisu štampali taj vražji kalendar.
Kada san ja bil mali, va našoj kući i po susediman, a i po celomu Rabu, duron su se mogle čut ćakule o viškamin i ukodlaciman. Tako smo mi dičina vajk bili va strahu. A naki mod i ne bimo bili kada su nas strašili zotiman vražjiman ukodlaciman. I dabome, nikad nismo čuli da su po našemu Rabu tancale i dobre vile, a ne samo viške i ukodlaci. I ča se je dogodilo?
Sve manje nan vrime gre na ruku za stat po vanu, pa sve više virimo va onu vražju televiziju i svi oni mogući dnevnici. Ma jopet nikakor dočekat da će se ča to pametnoga va državi dogodit. Jedino oni na vlasti, svi redon ki jesu, jedino oni govoru da sve gre na bolje.
Letu dani i pasivaju kako da ih niki vrag grubo naganja, kako da in ma šćeto duron za petamin teče. Ali dobro je, boj važno je da smo mi učinli i ku bačvicu vina.
Rapska fjera dobila je ovih dan nagradu. I to velu - ni manje ni više nego da je to bil najbolji turistički događaj godine. I čestitat valja sviman, dabome. A turistički izleti? Neka znate da bi mi i za to mogli dobit, ako ne velu, a ono makar jednu manju nagradu.
Kuntrivan ja Anđela Brnu va onomu novomu gradu, tobože Šarengradu, va Malomu Palitu. Gre un po ulici, ali vajk va zadnje vrime gre samo od sazmorca. Tobože, tamo od banke pa na vamo. Nikad z druge bande.
Va jednomu lipomu danu i ovo san, ma odavna već, zapisal: "...Ne, ne - ni većega gušta nego rano z jutra na more poć. Tiho je i bonaca kako da mora ni, a sunce se jušto pomalo diže zgor Velebita. Obala zelena, žal miruje, a more je ne samo mirno nego i bistro kako suza. Dno se vidi, ježići se leno miču, travina se na stenju lenasto lela, a ona lipa i šara žotrica na prešu uteče od jedne va drugu bužu. Jedino ona mala bajica ima kuraja pa će se z vamin dobre volje i malo poigrat. Črška više ni, pa se i tići bolje čuju va gušću, a gori visoko lastavice igraju kolo, dozivaju se i šapuću - bit će da se i one pomalo za partencu svoju parićivaju. A galebi! Ma kako galeba ne spomenut! Oni se svakuder prezentaju. Zgora letu i ki put zakriču, a doli na moru mirno plavaju na bonaci, oli se za kon retkon ribicon zaletu. Ma kako je lipo tu sliku gledat i unako je z gušton i doživit..."
Istešo, va ovomu pasanomu vrimenu od nikuliko dan dogodil se je ne jedan, nego šćeto i više tumbuli. Ako se je vrime najedanput, ma diboto za jedan jedini dan, prominilo od leta va jesen i ako smo od kratkih gaćic morali skočit va one od dugih nogavic, oštija, a ča je to nego jedan veli tumbul. I još se nato sada triba i naučit.
