Home Beseda po domaću Rapski kantunić našega Josa Fafanđela: GRIPA

Rapski kantunić našega Josa Fafanđela: GRIPA

0
Rapski kantunić našega Josa Fafanđela: GRIPA

Foto: RabDanas

 

Dabome, ljudi se boju te vražje gripine, a pugotovo oni ki su je već provali, pa govoru kako je to vela muka, boj da čovika va postilji sve živo boli, od febre goriš, niš ne moreš i niš te ni volja. Kako je da je, ma bolešćine su gruba stvar.

Rab danas oglas

A jušto ovih dan kuntrivan ja jednoga moga kumpanja Tončića, pa ga pitan da kako je, a un mi govori:

– A kako? Ja dobro, ma žena je va postilji.

Ala da je jadnu gripa obalila?, pitan ga ja, a un mi govori:

A ni ne, ni je gripa obalila va postilju, a nažalost nisan ni ja. Nego da su je križa latila bolit i to jako grubo pa da leži na postilji i duron samo skuca i skuca. I to jako naglas. A znaš ti, govori un meni, da je naša kuća na samoj cesti, pa se vani sve čuje ča se va kući dogaja. A žena samo skuca boj da je boli. Muči, govorin ja njoj, ja razumin da te boli, ali nemoj skucat boj će ju te ljuti zvana čut.

Pa neka me čuju, govori ona njemu, ča je mene zato briga, meni je kako laglje kada naglas skucan.

E lipa moja, da un nato govori njoj, i to ja razumin, ali ljudi kada čuju skucanje va sobi promislit će, nedaj Bog, da se ti i ja – seksamo.

Hodi kvargu, da mu govori žena, ne čini me smijat se boj me unda još i više boli.

– I to ti je ta dupla kumedija prijatelju moj, govori Tančić meni, boj ja moran duron, svako tuliko, hodit van na dvor, da ljudi ki pasivaju vidu da ja nisan šnjan va sobi. Tako ona va postilji skuca, a ja jadan vani – na dvoru drhćen!

 

  • Napisal: Joso Fafanđel (8.12.2017.)

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime