Home Beseda po domaću Rapski kantunić našega Josa Fafanđela: BOLEŠĆINE I LIKARIJA

Rapski kantunić našega Josa Fafanđela: BOLEŠĆINE I LIKARIJA

0
Rapski kantunić našega Josa Fafanđela: BOLEŠĆINE I LIKARIJA

Foto: RabDanas

 

Ali kada stariji čovik pade va postilju unda se zna ča je. A ča drugo nego nemoć, oli bolešćina.

Rab danas oglas

Pravo da van rečen, bolešćine i ne volin baš jako spominjat, ali ovih dan dočim otvorite televiziju, oli su vijesti o gripi, oli od rukometnoga balanja. Ala šu, volu nan malo i presjednicu države pokazat, da se ne zgubi i da znamo kadi je. Ali lako je za presjednicu, neće njoj bit niš, ma ova vražja bolešćina od gripe je drugi par postolov. Boj, tobože, da je jušto sada njezino vrime i da more učint vele kumedije. A i svaki put reku kako ih je sve više i više obolilo. Počalo je od hiljadu, a sada već spominju i osan hiljad onih kih je jušto gripa obalila va postilju.

Mlade ljude med kućete ne obaljuje nikakova bolešćina nego ona lipa potriba ku dodar i maške ćutu va ovomu štajunu od godine.

Spominjen postilju zato boj govoru da je gripu najbolje va postilji i prebolit. Ma ne samo najbolje, nego da se i mora, boj da čovika zazbilja obali i znemoća, pa da i ni druge nego s punin provinćon febre drhtat i ležat va postilji.

A ovi ča su još zdravi duron se pitaju da je bolje cipat se kutnra te vražje gripe, oli stat na miru i ne cipat se, pa ča bude da bude. Boj govoru da se je puno njih i cipalo, ali da je za nesriću, navalila nika druga sorta gripe, pa da ni cipanje ne pomaže. I unda ljudi isto oboljuju.

A i ja san študijal, tobože, da ča ću? Ali nisan se cipal ni ove godine, a i nikad do sada. I jopet ja pitan, a koga drugo prvo nego moga suseda, da je se un cipal kuntra gripe? A un mi govori: Da ti tata onoga, cipat se da! – kako ne! A zač ja sadin luk i kupujen vino! Luk i vino- to je likarija

  • Napisal: Joso Fafanđel (17.1.2018.)

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime