Home Beseda po domaću Rapski kantunić našega Josa Fafanđela: KRIŽEVA, MA NA DRUGI MOD

Rapski kantunić našega Josa Fafanđela: KRIŽEVA, MA NA DRUGI MOD

0
Rapski kantunić našega Josa Fafanđela: KRIŽEVA, MA NA DRUGI MOD

Foto: Autor fotografije: Miroslav Maroević (iz zbirke Josipa Andrića)

 

vajk bi se užalo marendat va toj gostijoni u Taribe, ku još i ja pametin najviše po jako slasnomu gulašu. Naki mod bi i od čega to Joso i njigova Kate skuhali gulaš s kumpiran, to niki nezna, ali da je to bil gulaš od svih gušti, e to već svi znaju.

Rab danas oglas

Va ono vrime se je znalo poć na ubed, oli marendu u Taribe, Gradu va onu nidanju gostijonu ka se je zvala “Bolje tu nego tam”. Moglo bi se reć kako je bil običaj ljudi od svakoga sela, kada se ide po potribi Grad, bilo na općinu, na sud oli ča drugo, vajk bi se užalo marendat va toj gostijoni u Taribe, ku još i ja pametin najviše po jako slasnomu gulašu. Naki mod bi i od čega to Joso i njigova Kate skuhali gulaš s kumpiran, to niki nezna, ali da je to bil gulaš od svih gušti, e to već svi znaju.

 

Gulaš ma za prsti polizat. I bit će da se je to dopalo i onomu Loparaninu ki je bil za Križiman. Ali un ni samo hodil za Križiman, nego bi celi put od Lopara do Grada i nazad, nosil na dugoj lanči i onaj crkveni barjak na komu je bil nactan njihov svetac, Sveti Ivan, kako in se i crikva zove.

 

 I gre tako Loparanin po tomu putiću, lela se unako va bevandi malo simo, malo tamo, kad zakači mu barjak od sv. Ivana za kupinu

Tako se i dan-danas povida kako je taj Loparanin potle mise na Križevu šal na ubed u Taribe, stavil je barjak va kantun, ubedval je i dabome, potle dobroga gulaša malo je, ma isto priko mire, i popil one Taribine bevande. I unako umoran, a još više ošamućen od vina, stavil je barjak od sv. Ivana priko ramena i šal pomalo doma, kuntra Loparu. Ali kroz polje Mundanijah oli Drazi bil je samo uski putić ki je hodil sve uz sami potok, a potok zarašćen, a put najviše va kupini. I gre tako Loparanin po tomu putiću, lela se unako va bevandi malo simo, malo tamo, kad zakači mu barjak od sv. Ivana za kupinu, a un se je zalelal i zvrnul zasvin barjakon nutra va potok. Malo je stresal glavu, pa da govori: “Ma sveti moj Ivane, ča tako? Ja tebe celi put nosin, ruke me bolu, a ti mene tumba va potok.”

 

  • Napisal: Joso Fafanđel (4.5.2018.)

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime