Home Beseda po domaću Rapski kantunić našega Josa Fafanđela: ZEMLJA – BALA OLI RAVNA TARACA?

Rapski kantunić našega Josa Fafanđela: ZEMLJA – BALA OLI RAVNA TARACA?

0
Rapski kantunić našega Josa Fafanđela: ZEMLJA – BALA OLI RAVNA TARACA?

Foto: RabDanas

 

Tako i ja šemprije ponavljan i zanovićen da vrime brzo kuri i da je priko mere naprešno. Ali ča ja moren kada je zazbilja tako. Oštija evo, a čini se more bit i vamin kako da je čera bil prvi maj? Meni da, pa je za ne virovat da su od unda pasale već cele celcate dvi šetemane. E da, boj evo – već smo na polovici od maja. Ben, ma ča se tudi more učint? Niš brate! Vrime kuri unako kako je vajk i kurilo, nikad ni bržje ni pomanje, a namin ljudima se to samo čini da ki put gre pomalo, a ki put malo prešnije.

Rab danas oglas

 

Ne, ne – i zemlja i sunce se na isti i jednaki mod okriću već odavna i oni neznaju ni za prešu ni za marendu i počitak. A pametni ljudi su to isto već odavna doznali, nas drugih su to navrime naučili, ali, na velu žalost, još duron ima onih ki i dan-danas govoru da naša zemlja ni okrugla, ni bala, nego da je ravna ploča. I unda se mi čudimo da svit gre pomalo naprvo, da se još mrzimo i borimo za meje, pa da tvornice delaju puške i bumbe i da još vajk čovik more pucat va drugoga čovika i zatrt mu život ki je jedan i jedini na ovomu svitu. A ima i onih ki mislu da ako ubiju drugoga, da će ju unda za nagradu poć va raj. A to je jušto ista ona pamet ka govori da zemlja ni okrugla nego da je ravna taraca. Ja bi takoviman kupil jedan veli rusak i jedne dobre postole pa bi ih uputil neka gredu naprvo i samo naprvo, pa neka vidu da će jednoga dana arivat na isto ono mesto odokli su i partili. I sretan in put, brate moj, po toj njihovoj ravnoj taraci.

 

  • Napisal: Joso Fafanđel (11.5.2018.)

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime