Foto: Foto: Hrvoje Hodak
{gallery}Za tovara{/gallery}
Tako i mi moremo kroz zeleni orćali gledat sve ono ča su ovih dan na Rabu govorili oni od Velamar-Imperijala, pa ministar Capelli, a i naš gradonačelnik, dabome. Sve samo med i mliko.
Nabrajali su lipe milijarde ča će ju ih pomalo rivat va naš turizam na Rabu, pa unda i bolje plaće, dabome. Sve je bilo lipo za čut, pa bi bilo lipo da in sve to za prvu ruku i virujemo. Oštija, a ča ćemo hodit nazad, misto naprvo! A to je i vela firma pa more puno tog veloga i učint. Zato mene navelo i jada ča su ovi naši od Imperijala prije vrimena prodali recimo onaj restoran Malin va Drazi. Lipa lokacija i sve novo učinjeno, a sada stoji za ruglo. Stakla su porazbijana, pa novi”gazde” sve pokrivaju zonan črnon mrižon da se to ruglo ne vidi. Ali isto se vidi.
Vidimo i mi, a vidu i naši gosti, na velu žalost. I to svake godine nanovo. A da ne govorin da je priz restoran i lipi trgić, popločan va mramoru. Tamo su se jednaput i priredbe i tanci dogajali, a sada pucaju i padaju one ploče od mramora i taču se skaline. Va malomu parkiću i oleanderi na silu rastu, a medanji je još i sada travina i priko pol metra visoka. Gosti pasivaju, a ni koga ni da travinu pokosi. I još med sve to najloni, prazne škatule od cigareti i bočice od plastike.
Turizam?! Ne, nego antiturizam i to od pet zvezdic. Tudi se ni tovara nebi moglo zeleniman orćaliman prevarit
- Piše: Josip Fafanđel, 15.6.2018.