Home Beseda po domaću Rapski kantunić Josa Fafanđela: DUPINI

Rapski kantunić Josa Fafanđela: DUPINI

0
Rapski kantunić Josa Fafanđela: DUPINI

Foto: RabDanas

 

Šervival san za ovoga pasanoga lipoga vrimena kako bi se Gradu od rive još ki izletnički brod odvezal i popeljal bi gosti na izlet. A i oni veli dalmatinski brodi isto se moglo šervat na Novoj rivi. Eto, i to je govorilo da sezona na Rabu još dura, da se neda.

Rab danas oglas

 

A unda san se domislil kako su, ma odavna već, Ive Lupić i niki Kamporac kako mornar, vozili pun brod Slovencov na izlet. A njihova najveća želja je bila da ih oni popeljaju tamo kadi se moru vit dupini kako plavaju i zmora skaču van.

 

Dan je bil malo oblačan i davalo je da će arija poć na daž, ali more je bilo va bonaci. I partili su oni uz Mali Laganj na otovoreno more kuntra Lošinju, boj tamo se najviše i moru dupini šervat. A Slovenci su se svi nagnuli na ograde pa fiso viru i gledaju kada će se prvi dupin pokazat. Ali ča ćeš vraže, baš toga dana nideri dupina ni za lik. A unda se je još više naoblačilo i počalo je pomalo unako na tiho dažit.

 

Slovenci, dabome, duron pitaju da kada će se ti dupini već jedan put pojavit. A Ive Lupić da in govori: A gotovo je, lipi moji, neće se oni danas više pokazat! A zač?, da pitaju Slovenci i čudu se, dabome. A Ive da in govori: Ma ča vi neznate? Dupin van je jako pametna beštija i neće van un skakat zvan mora kada daži. A ne!

A zač ne?, pitaju Slovenci. A Ive da in govori: A zato boj daži, pa kada skaču van unda se boju, da će ju se na dažju – zmočit.

 

Evala i Kamporciman – ma svaka in čast!

 

  • Joso Fafanđel, 26.10.2018

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime