Home Beseda po domaću Rapski kantunić Josa Fafanđela: RAPSKE VILE

Rapski kantunić Josa Fafanđela: RAPSKE VILE

0
Rapski kantunić Josa Fafanđela: RAPSKE VILE

Foto: RabDanas

 

Snježana je sve to zamotala va jednu ćakulu: i vile i našu zlata vridnu vodu i naši znani, lipi i vikoviman stari zvonici. Pa istešo, kako i svaka bajka, sve na kanati na lipi mod i završi. Ono ča je najvažnije i lena Iva se je zasvin obrnula, pa je i ona postala i dobra i vridna kako i njezina sestra Ana.

Rab danas oglas

Evo, jušto va ovomu štajunu od blavdanov Snježana Turković dopeljala je med nas ni manje ni više nego lipe, dobre i šesne rapske vile. Bravo i jušto mi je drago da je baš ona to učinla, ona ka z dicon barata Gradu va našemu vrtliću, boj te, kako ih je ona nazvala – Rapske vile su najviše za dicu i prezentane i to va jednomu lipomu libriću (slikovnici) ku je niki dan sviman i pokazala. Snježana je napisala lipu štoriju, mali Roko Faflja se je latil crtanja, a Hrvoje Hodak i Ive Šubić su malo to i poslikali.

Štorija, oli bajka, dogaja se med naša četiri zvonika, kiman je Snježana dala i imena, pa su oni redon: Justina, Andrija, Ivan i Marija. A i vile imaju svoja imena i to od rapskih izvorov pitke vode: vila Mlinica, Pidoka, Vodenča, Snuga, Ošit i vila Jerkovica. Vile po noći tancaju i čuvaju naši izvori od vode, a dvi sestre, Ana i Iva, zalivaju vrtli, cveće i nosu vodu za beštije i svoje žajno blago napit. Ali kako i va svakoj bajci Ana je dobra i vridna, a Iva baš i ne. Iva voli linčarit, više spat i grusti je se latiti bilo kakovoga posla.

Snježana je sve to zamotala va jednu ćakulu: i vile i našu zlata vridnu vodu i naši znani, lipi i vikoviman stari zvonici. Pa istešo, kako i svaka bajka, sve na kanati na lipi mod i završi. Ono ča je najvažnije i lena Iva se je zasvin obrnula, pa je i ona postala i dobra i vridna kako i njezina sestra Ana.

I ča reć na kanati, nego bravo Snježana! A slikovnica neka ne stoji po škatulamin i policamin, nego neka ariva va ruke dici ka i od toga libra moru samo lipe stvari naučit.

 

Meni se nikakor više pari da su viške i ukodlaci još na životu, samo ča se više ne sakrivaju i ne strašu ljudi samo po noći. Viške i zločesati ukodlaci dali su se navidelo i med nas su se petali. Oštija, a ima ih svajdi, a najviše va pulitici i na vlasti, po kancelarijah i strankamin.

Istešo, ma oću reć i ovo. Naše matere, oci, tete i babe, ono kada smo mi bili mali, povidali su nan samo ćakule o viškamin i ukodlaciman. Pitan se zato: kadi su danas šli svi oni viškuni i ukodlaci? Odavna nisan čul da ih je ki po noći kuntral. Niki se više zotin ne fali, oli čini hajduk ki se je kuntreštal z ukodlakon, dal mu nogadu i potiral ga ća osebe. Kadi su ona črna strašila ča su takala mocire, ča su po noći znali zajahat na čovika, pa ga sve do blizu kuće ne bi molali. Kadi su i ona svitla, one sviće ke su po gušćiman sred noći gorile, pa bi se gasile i jopet nagarale. Kadi su i one ženske ke su tobože po grobljiman sred noći šetale? Ne kuntrivamo ih, ni ih, nestali su i evo, arivala su nova vrimena kada nan misto ukodlakov sada dobre vile po noći svoj tanac tancaju. A je to more bit zato ča smo i mi potle puno vrimena postali bolji ljudi? Hm, sve me je jako strah da je to tako. Meni se nikakor više pari da su viške i ukodlaci još na životu, samo ča se više ne sakrivaju i ne strašu ljudi samo po noći. Viške i zločesati ukodlaci dali su se navidelo i med nas su se petali. Oštija, a ima ih svajdi, a najviše va pulitici i na vlasti, po kancelarijah i strankamin. 

 

Ben, ma zaburavimo mi ča više svi ti ukodlaci, a imimo više navar one dobre rapske vile od naše Snježane Turković. A ako, nedaj Bože, ki i kuntra onoga zločestoga ukodlaka, a Bože moj, ni se teško zaletit doma kod Snježane. E da, boj kizna, more bit da ona ima i moć da svojiman vilamin ošpota i rastira svi zločesti ukodlaci. A vi nemojte ni zamislit da ih više ni. Ne, ne more se pasat kroz život a da ih puten, a baren desetak, ne kuntramo. Da, ukodlaci su i danas med namin, jedino ča nas danas i po danu strašu, a sve mi se pari da nisu zgubili ni odnaj grubi nauk da nan ki put i malo krvi pocicaju.

 

  • Josip Fafanđel, Rab, 14.12.2018.

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime