Home Beseda po domaću Rapski kantunić Josa Fafanđela: INVENTURA

Rapski kantunić Josa Fafanđela: INVENTURA

0
Rapski kantunić Josa Fafanđela: INVENTURA

Foto: RabDanas

 

 

Rab danas oglas

Kako va celoj našoj državi, tako i ovo ude kod nas na Rabu. Da, bilo bi to jako pametno. Ali sve se mislin, ma ki san to ja, da jušto mene dopade red za čint tu nesrićnu inventuru. Meni ni drago čint ni onu moju inveturu doma, a kamo li va općini, oli nedaj bože, va celoj državi. Dabome, dočim bi se doma latil toga posla vreda bi se zaplel kako va kupinu, oli jariku. Da ne govorin kako bi mi va tomu poslu unda otila i moja parona pomoć. A kada se parone zapletu va taj posal unda se već unaprid more znat ča bi se
dogajalo. Dabome, ja bi više brojil za inventuru ono ča san dobro učinil va pasanoj godini, a ona bi vreda nadodivala i ono ča baš i ni bilo kako triba. I ki bi za sve to bil kriv nego ja. A ča triba i govorit.

 

Zato je lipo najboje stat smiron i ne lovit se toga posla. Tako neznaš ča si dobro učinil, ali unda neznaš brate ni ča si žbaljival. A teško se je kolo toga i složit va fameji ča je to dobro, a ča ni drobro učinjeno. Evo za jedan primjer, po meni je pasane godine više puti bilo za dobro kada bi se zaletil namore s kaićen va hotadi da latin ku lignicu za ubed. Ali već se zna da pasana godina ni baš bila dobra za lignu ćapat, pa bi najviše puti znal arivat doma i bez jedne jedine lignice va cigljiću. I dabome, parona bi unda vreda rekla da to ni bilo pametno, da san zgubil popodne i da san za to vrime mogal puno posla kolo kuće učint.

I ala, pojte vi unda čint inventuru. A naki mod kada ja zemen varuke olovku i sinjivan sve ono ča gre va dobar posal, a parona zimlje varuku onu ditesku gumicu i za manon pomalo tare i nadodiva i ono ča san tobože i žbaljal. Ne, ne pijaža mi se takova inventura. Hiti kartu va oganj i stoj s miron, govorin ja sam sebi. I neka znate da nisan pogrišil. Da ne govorin da san još i onu njezinu gumicu z velin gušton sakril.

 

  • Napisal: Joso Fafanđel, 4.1.2019.

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime