Home Beseda po domaću Rapski kantunić Josa Fafanđela: LOPARČIĆ

Rapski kantunić Josa Fafanđela: LOPARČIĆ

0
Rapski kantunić Josa Fafanđela: LOPARČIĆ

Foto: RabDanas

 

Evo, uvako je hodilo. Pitan toga prijatelja da ako mu je bolje, a un mi piše SMS da su mu z nosa zneli niki vražji tamponi i da nikakor ne smi bit va teplomu, nego samo na mrzlomu. A ja mu odgovaran, da je ovih dan vani jušto po meri mrzlo, pa neka kancelariju i kompjuter hiti van na dvor i problem je rešen. E, ali da to ni sve, piše un meni, pa nadodaje kako mu je mala pala i da je prebila prst na dva mesta. Ma ni to ni niš, pišen ja njemu, dite je i zaličit će, a da je najvažnije je da mu je baren žena va dobromu stanju, pa da ih more služit. A un jopet odgovara, da niš od toga, boj da je i ona počala svako to malo teć va zahod. Ja san se nato nasmijal, pa san mu odgovoril, da unda neće bit druge nego da kancelariju triba premestit van na dvor, a zahod – va kuhinju.

Rab danas oglas

I sada gre ona pisma o fažoliću, ka varamente ne govori da potle fažolića valja teć va kundot, ali nas aviziva, da je moguća ona vražja grmljavina, a unda dabome i onaj grubi vonj. Ma, ja san isto rekal kako bi ja sve to pregoril samo da baren jedan put misečno moren toga fažolića unako na salatu parićat. Ma niš drugo ne triba, jedino kuhani fažolić, malo kapule, domaćega osta i dabome, par zlic i domaćega maslinovoga ulja. Svi gušti! A diboto bi rekal kako je lako moguće da bi to mogal bit pravi lik i za kakove bolešćine. Prehladu oli gripu, recimo.

Naideš se lipo fažolića, pa potle sve bolešćine letu z čovika van, ozad, kako kroz auspuh, da prostite.

 

I sada bi ja vamin priporučil da ki put i sami provate, ali lako je to priporučit, ma kadi kupit toga veseloga loparčića. Ako se zove loparčić unda bi ga tribalo bit, a kadi drugo nego Lopari. Ali bojin se da su se i Loparani ostavili toga posla od kad su se dali samo va turizam. Inšoma, kuliko moren šervat i njihovo polje je va travinu zaraslo. A drugi su unda po redu Mudanici. I moren van reć da se jedino va njihovomu polju vidi da se ka-ta njivica još drži kako triba – da se ore i sadi.

Tako su i Mundanike jedanput isto znale imit na pijaci i maloga fažolića za prodat. I nebudi len, kupil ga je od njih i moj sused, pa sada, nećete virovat, svake godine kolo kuće posadi kilo, oli dva i to od svoga simena. I eto ti prlike da i mene ki put dopade par ubrokov va godini. I zato smo se i ja i moja parona zasvin uvjerili da je Ćokić imil pravo kada je va onoj pismi od fažolića zapisal: Fažolić – loparčić, rapski je specijalitet. Njega su naši stari zgušta ili – ma su ben! i grmili

 

  • Napisal: Joso Fafanđel, 18.1.2019.

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime