logo mix

Rab Danas

Nezavisni internetski portal otoka Raba

  • Imperial
Nedjelja, 17 Veljača 2019 09:25

Rapski kantunić Josa Fafanđela: VALENTINOVO

Autor:
Ocijeni sadržaj
(1 glas)

Pasanoga četrtka svi su se na svoj mod raspivali na račun ljubavi. Oli još bolje, na račun zaljubljenih. Dabome, a ča triba i govorit kada je na taj dan bilo Valentinovo. 

 

Ben, ma meni bi se isto više pijažalo da je to bilo sinjano kako dan od ljubavi, nego dan od zaljubljenih. Da, boj bit zaljubljen je jedno, a ljubav je već drugi par postolov. Varamente, kuliko mi stariji pametimo, ala šu, valja reć da je lipo bilo ki put bit i zaljubljen. Tobože, ono kad si mlad i kada kuntraš šesnu divojku ka ti se lipo nasmije, pa je drugi put kuntraš i ona ti se nanovo nasmije. A kada sve to unda završi i va kakovomu škuromu kantuniću, e unda se tekar ljubav nagori kako oganj koga šverinon potakneš.

 

Sve je to lipo, ali vela je muka kada se zaljubljeni ni va škuromu, ni va svitlomu kantuniću ne moru kuntrat. Unda to ni ljubav ka daje gušti, nego ono ludo namuranje ko čini muku va štumku i pamet pomućuje. Da, da - prava ljubav je puno stabelija i puno slaja od, diboto bi rekal, onoga diteskoga namuranja. A meni se pari da se danas mladi sve više i više jedan va drugoga samo namurivaju, pa se na prešu pozakonu i unda namuranje pasiva, a ljubav se još ni primila. Misto ljubavi, unda se više med mladi riva gruba beseda, karanje i kuntreštivanje. Da ne govorin kako se naglo dogajaju i nova namuranja. Evo, jušto san niki dan čul, kako se danas kod nas va državi svaki treći brak raščinja. Zaman i namuranja i Valentinovo i pokloni i luzari i svake sorte cvetići. Svi se niko vrime trpu dok su mladi, dok ih još onaj prvi oganj od ljubavi drži, a potle se rastaju, pa kud koji mili moji. A diboto bi rekal da je i bolje tako nego da ljubavi ni, pa se ljudi samo trpu i karaju, a radi reda se dodar i rožice za Valentinovo kupuju, makar se i od daleka sve vidi i sve zna. 

 

Nasmijal san se zato na onaj sulac kada jedan pita svoga kumpanja: Ćo, a ča si ti zel ženi za Velanitnovo?

A un da mu govoi: Zel san je 100 euri va torbici. 

 

A ona naša znana Žuži Jelinek, znala je reć i uvako: Pećnica uvik mora bit tepla, da bi se kiflica digla. 

 

Jadne rožice, ča one sve moraju potrpit!

 

A ča ćete, danas nas va ovo dananšnje virme tuliko toga muči i gnjavi, da više ni jedan drugoga ne moremo tpit. I to ne samo muški muškoga, nego i ženska muškoga, a i muški žesku, dabome. Svi se trpu nikov rime dok su mladi, dokli ih još onaj oganj prvi oganj od ljubavi drži, a potle rastava - kud koji mili moji. Zoto se i dogaja ono ča san već spomenul, tobože da se danas va ovoj našoj državi svaki treći brak raščini. Ma jopet, diboto da bi ja rekla kako je i to bolje nego da jedan drugoga mučimo i maltretiramo. Ala šu, more bit da bi bilo lipo trpit baren dokli dica narastu i idu svojin puten, boj nikakor mi je žal onu miću dičicu, ka ostaju oli bez oca oli bez matere. A ki će vrag tomu ditetu stavit vaglavu, zač oca oli mtere, najedanmput više ni. Oštija, a i to je jedan veli stres za malo dite. Inšoma, a unda se ja njanci malo ne čudin i na ono kada va novinah pročitan da samo 16% malih školantov voli hodit va školu. To pari da ih više od 80% školu ne voli. Ma ne samo svoju, nego i svaku drugu.

Varamente, pročital san da to važi samo za grad Zagreb, boj da je takova anketa tamo i učinjena. Oštija, a zač bi drugamo, pa i ovo ude kod dnas, to bilo na drugi mod? Ako bi i bilo na drugi mod, ma bi tračilo na gore ne migo na bolje. Istešo, možda je recimo kod nas na Rabu i manje takovih školantov, a to more bit i zato boj se kod nas manje rastaju njihovi oci i matere. To govorin napamet, dabome, boj se meni samo čini da se naši mladi na Rabu manje rastavljaju. Čini me se, ma isto svako tuliko čujen da su se ovi,oli oni raščinli, pa more bit da bi se i prevaril. A tekar in dite gre va prvi, drugi, oli treći razred.

 

Ben, ma jeste šrevali čega san se ja danas ćapal? A o svemu tomu more bit da nebi ni besede rekal da va ovoj šetemani ni bilo toga sritnoga, oli nesritnoga Valentinova. Ali jako se bojin da je bilo više rožic i bevande, nego onih teplih pećic...

 

  • Joso Fafanđel, 15.2.2019.
Pročitano 645 puta
Josip Fafanđel

Ova e-mail adresa je zaštićena od spambota. Potrebno je omogućiti JavaScript da je vidite.

seakayakcroatia

 

Popularno

Novi oglasi

Peć kamin Aurora Plamen
( / Građenje, opremanje, uređenje doma)

Peć kamin Aurora Plamen

Gliser Elan
( / Auto, moto, nautika)

Gliser Elan

Ford Cmax 2016.g.
( / Auto, moto, nautika)

Ford Cmax 2016.g.

Posljednje teme s tužibabe

U nastavku dostavljam slijed dopisa koje sam slao komunalnom redaru, gradonačeln...
Prije 2 godina 0 23560
Imate neki problem koji treba netko riješiti... Ne znate tko je nadležan za rješ...
Prije 3 godina 0 28966

Novo u imeniku

Web Arba

Obrt Web Arba od 2005. posluje na otoku. Bavi se servisom računala i računalne opreme, izradom…

Sea Kayak Croatia

Mala tvrtka za velike doživljaje na Jadranu!