logo mix

Rab Danas

Nezavisni internetski portal otoka Raba

×

Upozorenje

JUser: :_load: Nije moguće učitavanje korisnika sa ID: 745
Subota, 16 Ožujak 2019 10:42

Rapski kantunić Josa Fafanđela: HRĆIŽ

Napisao/la
Ocijeni sadržaj
(1 glas)
Rapski kantunić Josa Fafanđela: HRĆIŽ Foto: Hrvoje Hodak

Marčeni su dani, ma proliće se isto pomalo riva naprvo. Zato mi ovih dan i je palo na pamet za učint jednu malu inventuru, tobože da kakovo je sve cveće već po vrtliman i po gušću procvetalo.

 

I puno san toga sinjal, pa san se unda malo fermal na onomu lipomu modromu cveću za koga najviše od njih reče da su to zumbuli. Fermal san se boj pametin kako je moja mat vajk govorila da su to vrćuzuli. Lipi modri vrćuzuli, unako svojiman kapicamin obišeni, ki dušu na mod da je veli gušt i stat medanji. E, ali sviman se to ne pijaža na isti mod. Meni ti zumbuli, oli vrćuzuli dušu da moren uzanji i celi dan trpit, ali drugi jopet govoru da imaju jak vonj i da ih ne moru podnest. I ne samo to nego da kada macić toga cveća stavu kuću va žmuljić, da se unda njihov vonj rastre po celoj kući, pa da ih od toga boli glava. Meni to nikad ni bilo ćaro, naki mod glava more bolit od lipoga duha od cveća.

 

Ali, znate naki mod su mi pali napamet ti vrćuzuli? Bil san niki dan kod jedne Kamporke (Jasne) va kući, pa san šerval da i ona ima va žmuljiću lipi macić onih modrih vrćuzuli.

- Lipo dušu!, govorin ja njoj.

A ona mi govori: - Da, to su zumbuli - i ja jako volin njihov duh.

- Da, to su zumbuli, potvrđujen ja njoj, pa je govorin da smo ih mi po domaću zvali vrćuzuli.

- A kako ih vi Kampori zovete?, pitan ja nju. Ona se je malo čudila na tu rič vrćuzuli, pa mi govori da oni Kampori za zumbuli reku da su to hrćiži.

- Kako?, začudil san se i ja sada, a ona mi nanovo i unako čisto i destezo govori, da Kamporci to zovu hrćiž.

Ala šu, ima tudi i sličnosti: vrćuzul - hrćiž, i bilo mi je drago da san i tu besedu zapisal, pa to evo sada i vamin prezentivan. Ali da imaju grubi vonj, e zotin se ne moren nikakor složit.

 

To isto jedni govoru i za brneštru kada cveta tamo va maju, tobože, da ih i od njezinoga vonja boli glava. Pravo da van rečen i zotnin se ne moren složit. Ala šu, da me glava boli od bedaste i munjene pulitike, e to je već drugi par postolov. A da ne govorin da ima i ljudi ki isto znaju jedni drugiman glavu napuhat. Ben, ma zasvin san siguran da za to nisu njanci malo krivi ni zumbuli, ni vrćuzi, pa ni hrćiži...

 

  • Joso Fafanđel, 15.3.2019.
Pročitano 1972 puta

Ova e-mail adresa je zaštićena od spambota. Potrebno je omogućiti JavaScript da je vidite.

seakayakcroatia