Home Beseda po domaću Rapski kantunić Josa Fafanđela: SPOVID

Rapski kantunić Josa Fafanđela: SPOVID

0
Rapski kantunić Josa Fafanđela: SPOVID

Foto: RabDanas

 

Gedal san na telviziji kako je onaj niki jaki vetar isto činil kumedije i gori po Zagrebu, pa se je vidilo kako je dosta toga bilo i zrušeno. Ben, ma gren ja niki dan potle te bure Grad, arivan blizu onoga našega hotela i vreda san auto zabrenzal.

Rab danas oglas

Ma ča je ono, govorin ja sam sebi! Komad hotela je malo vit sprida, a ono zada je sve zrušeno i leži va gromači na podu.

Bože moj, čudin se ja, ma ala da je ova pasana bura i hotel zrušila!? Ali vidin ja nutri i jedan veli bager, a tekar potle su mi rekli da se to hotel zazbilja ruši i da će ju tamo učint novoga.

Razumin da staro triba rušit i čint novo, ma meni je nikakor isto žal toga našega hotela boj taj del Raba neće više bit ono ča je bil. Na svakoj našoj razglednici kada se gre od Nove rive po obali vreda se najprvo vidi: gori hotel, a šoto na svoj mod lipi hotel. Zato bi ja baren to njigovo lice sprida za vajk ostvil, a zada neka unda činu ča ih je volja. Ako tako ne učinu unda će puno od njih, a i ja med njiman, svaki put kada tamo pasamo, zakljat onoga ki je našu lipu Istru obalil. I ja ću to duron čint pa makar se svaku nedilju poradi toga moral i spovidat.

 

Jušto kako i onaj naš Tiho Marojević ki nan je ovih dan va kafiću povidal jednu njigovu štoriju. Tiho je do penzije živil gori va Slavoniji, a ima danas i priko 80 godin.

Povidal nan je kako je jedno vrime tamo hodil z jednan jednako starijon Slavonkon, ka je jušto bila bez muža ostala. A va isto vrime da se je i va jednu puno mlaju namural. Ta starija da je žvila na selu i da je bila dobroga stanja. I jednoga dana arivala je ona od sela kod njega doma va grad, skuhala mu je ubed, ali z večera da gre ona nazad doma. Dabome, un da je na svaki modi nagovara neka ostane kod njega spat, boj da koga će vraga po noći putovat. Ni ona s prva otila, nećkala se je, ali ćakara, ćakara i završila je ona va postilji. Ali evo ti ga zla, samo ča je legla, vreda se je digla i da gre ona doma.

Ma ča ti je, govori un njoj, ki vrag ti je sada? A ona mu govori da se je predomislila i da ne more ostat kod njega spat.

Ala reci, ma zač ne moreš?, pita un nju unako na lipe. A ona da mu govori: – Skužaj, ali ne moren ostat kod tebe, boj se danas nisan – spovidala.

– Ma ben san se ja i njoj osvećeval, govori Tiho. Slala je ona meni i naprvo svoji kulini i domaće kobasice, a ja san sve to potle onoj mojoj mlajoj nosil.

 

Joso Fafanđel, 19.5.2019.

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime