Foto: Foto: Hrvoje Hodak
E, a zato se i reče da je vruće kako pakal, boj da je tako jušto i gori – va paklu. Tamo da ne potiču oganj svako malo, nego da po celi dan i noć, duron i na svu silu – samo ložu i ložu. I to vrazi, pravi pravcati vrazi, oni ča imaju veli rozi i dugi črni rep.
Tako se to pripovida, ma ja to nisan vidil. A da van pravo rečen, ne bi baš ni volil vit.
Ala, ala.., ja varamente mislin da i nisan tako zločest čovik da bi moral poć baš tamo – va pakal. Ma oni ki su zločesti, ki činu dišpeti i jadaju i sebe i drugoga, e.., neka znaju da će ju jednoga dana poć tamo kadi se po celi dan i noć duron loži veli oganj. Oću reć – drito va pakal!
A neka znate, da ja ki put unako sam sobon činin račun, boj jako san intreguz i volil bi znat kadi ima više ljudi – va raju, oli va paklu? Kuliko ja znan, odonud se nažalost još niki ni nazad tornal pa unda o tomu niš i ne moremo znat. Ma ne znamo njanci je toga gori oli ni. A kako ćemo i znat kada niki ni vidil. Crkveno virovanje nas uči da je, da toga gori ima, ali puno ljudi jopet misli da ni pakla, ali na žalost, da ni raja ni. A ki zna? More bit da je i najbolje da se ne zna je toga gori oli ni. Tako da oni ki samo činu zlo, da se moru baren pakla bojat. Da budu va strahu. Boju se malo pakla, a malo i pržuna pa lupežariju skarsivaju.
Jedino, ča na velu žalost, ima puno i takovih peršon ki se više ne boju ni Boga, ni vraga, ni zatvora, ni pakla.
Dabome, unda činu ono ča ih je volja, a mi od njih moramo strahovat.
Neka, nekama isto se govori da sve kad-tad ariva na svoje.
Reče se da vrč gre navodu – ma samo dokli se ne razbije. Inšoma, to pitanje: je pakla oli ni, najbolje je debandat. Ma jopet, to moremo debandat samo mi, dabome – mi ki ne činimo nikomu zlo, pa je pakla oli ni – to nas njanci malo ne poida. A ne, boj mi ćemo lipo poć jedino, šćeto i jušto – drito va raj!
Ben ma, dani su od Petrove, vruće je, pa ni druge nego se malo potrt po čelu. A sve ovo dura već i više od šetemane dan. A i črškiman je to po volji pa kako da i oni piruju, ma pivaju brate z najvećega mota. I one male čačice, oli kakare, i oni veći ča po kolcima z guzicamin drndaju, da prostite. I ni in vruće kako namin, a nimaju ni potribu za vode se, oli bevande napit. A jopet, kada črška zgor glave od kite potiraš, un naglo zleti, zikriči se, a unda ti se unako z mota lipo po obrazu pocura. Celi dan na suncu pivaju, nikad vode ne piju, a puni su pišote!
Ma da mi je znat, naki mod se to dogaja. Da, ma ja nisan črčak! Po uvakovoj vrućini mi se zato baš jako i ne piva. Jedino ča se svako malo i ja moran poć pocurat, da prostite. Va kundot, dabome, makar se ki put nebi ni digal, nego bi se, ala črška – i ja lipo podase pocural
Joso Fafanđel za Kanturnić, 28.6.2019.
