Foto: RabDanas
A petnajstoga je kako i vajk Vela Gospa.
Pita mene segutra moj sused, da kuliko ga je danas, a ja mu govorin da je danas deveti agušta. A un mi nato govori: A zato je danas uvako vruće!
Ovo da pritišće va zraku ciklona, pa se parićiva da petnajstoga na Velu Gospu pukne nevera. A unda da je leto gotovo, od petnastoga da sezona od gosti pomalo kalmiva na sve manje i manje. A unda je još i zabeštimal sam na sebe, boj da je Vela Gospa na vratima, a un da još ni noge more umočil.
Nisi ni prvi ni zadnji, govorin mu ja. Ben, ma za nas domaći ima još vrimena. Oli bi ga baren tribalo bit. Boj, i celi deveti misec je isto lipi za kupat se, a sve to zna durat i sve tamo do priko 15. desetoga. Ma ako sve ide kako Bog zapovida, boj više puti se zna dogodit da i deveti misec vrime zahladi, pa se namin domaćima baš i ne gre močit noge more.
A gren niki dan na rivu do moga kaića, kad gledan koštivaju gosti z gliseriman, unako va budandamin od kupanja i muški i ženske. Ma ženske još imaju i puno užje budande nego muški. I svi se črnu oli črljenu kako da su od Afrike jušto arivali. A ja kuntra njiman bel kako sir, pa me je diboto malo i sran.
A to van je tako, dočim vidiš belijega čovika na rivi, vreda se zna da smo to mi domaći. Boj kako prvo, ne mažemo po sebi sva ona ulja i pomade da bimo ča više počrnili, a kako drugo, naš čovik sada nima ni vrimena za po celi dan se po melu na suncu takat. A ne! Triba stat doma, redit kuću i čekat gosti. A mladi još i lauraju po svojiman posliman, tako da ni druge nego ćemo vajk bit beliji nego naši gosti. A oni, i ženske i muški i dica, zasvin črni po celomu telu. Moru brate i budandice kalat, a nebi se ni vidilo da su goli. Sve črno – i sprida i zada, a dodar i mednoge, da prostite.
A mi domaći va gaćamin do kolen, makar još malo pa i polovica od agušta pasiva. Nedaj Bog da nan se samo dogodi da ostanemo beli zvana, a čni znutra!
Joso Fafanđel za Kanturnić, 9.8.2019.