logo mix

Rab Danas

Nezavisni internetski portal otoka Raba

Ponedjeljak, 26 Kolovoz 2019 06:08

Rapski kantunić Josa Fafanđela: ZAKLOPLJENI KUNDOTI

Napisao/la Josip Fafanđel
Ocijeni sadržaj
(1 glas)

Jušto ove pasane šetemane spominjali smo turističku sezonu za ku i struka i pulitka govoru da bi je tribalo malo produžit, tobože rastegnut. Nato jedan govori kako je već 60 godin ala laštika rastežemo i niš od toga (ni prvije ni sada) pa da se njemu čini kako se je taj laštik već jako rastegnul, ma jušto kako i onaj na duperaniman stariman budandamin. Otil je reć: laštik da, ma sezona ne.

 

A jedan ribar na peškariji mi je ovih dan povidal jednu ćakulu ku van isto oću prodat. Ben, ma vi ćete mene sada pitat da kakove to veze imaju budande zonin ča mi je taj čovik povidal. A lipo, imaju. Boj da bi čovik šal va zahod, oli kundot dabome, triba unda ne samo gaće nego i budande kalat. A ta ćakula jušto o zahodu i govori.

 

Povida mi taj čovik kako onaj javni kundot va Šrengradu već odavna ne radi. Ma ne da ne radi, radi un, ali je zaklopljen, a ključi da su dali jedino oniman ča prodaju na pijaci i peškariji. I nati mod, dabome, oni imaju kadi po potribi budande kalivat. Ali mi ki na pijacu, oli peškariju gremo kako mušterije robu kupovat, ako nas lati ona nesrićna potriba unda ni ča od javnoga kundota za poć se tamo oblašat, boj mi nimamo ključa. I unda su se ljudi domislili da va preši teku i curat i kakat (da prostite) va oni kafići ča su kolo pijace.

 

E, ali ča se dogaja? Ovi gazde od kafićev su to ukožili, pa da su pojedini od njih isto i svoji zahodi zaklopili. I to va sred sezone kada ne samo mi, nego i naši gosti imaju potribu za ki put na prešu se oblašat.

 

Na isti mod da su učinli i zonin kundoton Gradu, ča je ono tamo va parku. I tako sada ljudi govoru kako naši gosti moru ča više i ist i pit, ali da moraju trpit i da se ne smu i pokakat. A va jednomu kafiću da je čovik popil kavu, da ga je vreda potiralo i da pita un gazdu za ključ od kundota. A un da mu je dal ne jednoga nego više ključi va macu. A kako ću ja znat ki je od ovih pravi ključ?, da pita un. A gazda da mu govori: A brate moj pravi ti je onaj ki je najviše posran, oli popišan!

 

I tako, sva je srića da se recimo onaj nidanji fažolić-loparčić ne more nideri poist tamo va Palitu, oli Šarengrtadu. Sva je srića zato, boj ni fažolić-loparčić ni lipo ist tamo kadi su kundoti zaklopljeni. Gušna je to spiza, ali fažolić vreda čovika napuše. Ma ala šu, ako i napuše, unda se to more, da niki ne vidi i ne čuje, unako pomuče i na katridi spuhat. Ali fažol zna i ono drugo potirat, pa unda šempre i ni vrimena za iskat okolo ključi, oli provivat ki je ključić pravi a ki ni!

 

Joso Fafanđel za Kanturnić, 23.8.2019.

Pročitano 1438 puta

seakayakcroatia