logo mix

Rab Danas

Nezavisni internetski portal otoka Raba

Utorak, 15 Listopad 2019 10:25

Rapski kantunić Josa Fafanđela: DEMOGRAFIJA

Napisao/la Josip Fafanđel
Ocijeni sadržaj
(3 glasa/-ova)
Rapski kantunić Josa Fafanđela: DEMOGRAFIJA Foto: Goran Novotny

A Bože moj, ono ča čovika va ovo doba godine more veselit to je najprvo lipo vrime, ovi burini od jeseni ki nan daju ćaro nebo i puno teploga sunca.

 

Veseli čovika ki put poć i na ribu, pa latit kakovoga arbunića za ubrok. A ovih dan će nas veselit i masline, ako unako šare sve ne popadaju.

Triba ih i naprvo i mazit i pazit, pa ih triba i pobrat i učint ono gušno i zlatno ulje. Inšoma, sve su to lipe stvari ke čovika veselu i ke nan moru dat i lipoga kuraja za na otoku živit.

 

E, ali ima još jedna ka je mene va ovomu štajunu još i najviše razveselila. Ča se je dogodilo? Ma ni niš gruboga, nego se je šćeto jedna lipa stvar dogodila. Oštija, dogodilo se je da san potle onoga dugoga i teplog leta po prvi put gori na vrh štanta šerval kako visu oni dva - Lule i Liulica.

Ma kako su se samo šesno stisli jedan uz drugoga! Ona se riva va njega, a njemu sprida mednoge, kako i vajk jako, navelo i kruto jarbula ona njigova duga i šesna laganela. Dabome, ja san se nasmijal i govorin sam sebi: Oho, evo ti ga i prve ženidbe! To je posal!

A oni naši i veli i mali pulitičari neka i naprvo samo navijaju, trabunjaju i filozofiraju, neka študijaju i kukaju, boj da naki mod ćemo mi popravit naše demografsko stanje va državi.

 

Dabome, boj da nas je sve manje. Ne samo ča jedni gredu priko granice, nego i zato boj da je i dice malo za vit. Vrtlići su sve prazniji, a i školantov da je sve manje. Ostat ćemo na jedan put bez ljudi i država da će propast.

A ja nanovo popazin gori va Lula i Lulicu, pa mi dojde hotada za reć svima timan mudraciman, kako nima bolje študije za popravit demografiju nego gori na štantu šervat Lula i Lulicu. Oštija, a ča to unda pari? Dabome, pari da se mladi ženu, a ona duga i kruta laganela mednoge navišćuje da će i dičine bit, pa će se i naša demografija okujetat.

 

Da, samo mladi ljudi moru demografiju popravit. Ne migo vele študije od pulitičarov. Kada bi čovik jedino njih slušal država bi zazbilja propala. Boj, oni samo držu propovidi, medase se karaju i jedni drugih na svaki mod podbadaju. A od toga ni koristi. Neće karanje dicu čint! Ne, nego mladi ljudi se moraju više stiskat, a manje karat, pa da vidiš kako će ju i škole i vrtlići oživit.

Mladima jedino valja reć neka se samo držu onoga ča in Lule i Lulica gori od vrha štanta priporučuju. Ala šu, more se mladima i kakova pripomoć dat, ali neka znate da će jopet od svega vajk bit najvažnija ona šesna i žveljta - Lulova laganela.

 

Joso Fafanđel za Kanturnić, 9.10.2019.

Pročitano 993 puta

seakayakcroatia