logo mix

Rab Danas

Nezavisni internetski portal otoka Raba

Ponedjeljak, 18 Studeni 2019 08:15

Rapski kantunić Josa Fafanđela: MARTINJE

Napisao/la Josip Fafanđel
Ocijeni sadržaj
(1 glas)

Evo i ova gruba vrimena najavljuju da se pomalo i va zimu zatvaramo. Gosti više ni za vit, masline su pobrane, ulje je učinjeno, a na dan jedanajstoga od ovoga miseca moglo se je čut da je i dosta vina po konobah pretočeno.

 

Dabome, jedanajsti od jedanajstoga je tobože dan od Martinja, a to je štajun za prvo točenje vina. Oću reć, to je termin za vino stavit na čisto, odilit ga od one kaše na dnu bačav.

 

I to san otil reć, tobože, da su se baš toga dana, a i drugi dan na utorak, i na Rabu svi redon falili kako su vino pretočili i kako je po kuševanju bilo slasno i ukusno. I svi su govorili kuliko su vina učinli, a kuliko i one bevandine potle vina. A drugi su jopet činli i porkariju, boj tobože, da in je bevanda bila ukusnija nego vino, pa su sve skupa zamišali i hitili va jednu bačvu i vino i bevandu. I unda će se potle falit da imaju pravo vino, a more bit će bit prvije da će ju se jadat kako in vino ni po volji.

 

Na dan od Martinja, to je otil učint i moj sused, ali san ga na silu nagovoril da to ne čini. Ali kada san potle točenja došal kod njega na kuševanje, priznal mi je da ni mogal od manjega, pa da je va vino isto hitil 20 litar bevande. Tobože, na 100 litra vina još 20 litar bevande. Nisan ga zato pohvalil, ali san rekal, da ala šu, vino je dobro, a bila ti je i bevanda dobra, pa more bit da se sve to na lipo mod sljubi, kako se ono reče. A unda smo potle to šli i provat. I je, ono malo bevande ni puno ubilo pravo vino, pa po momu kuševanju, kada vino uzrije bit će ga od gušta žmulj popit.

 

Eto, tako je to bilo na dan od Martinja, ali, kako ono va reklami znaju reć - ni to bilo sve. Tamo nideri potle polovice od Dnevnika na televiziji, zove mene jopet sused, da neka dojden malo kod njega.

- A koga vraga ću jopet kod tebe, govorin mu ja, već san bil, Martinje smo obavili, i vino i bevandu smo kuševali. Ča oćeš, da nan već i od mladoga vina uši začrljenu? A vino mu je črno, a ne belo, to van nisan rekal.

- Dojdi pa češ vit, govori un jopet meni.

- Ma koga vraga me zove?- govorin ja sam sebi i mislin se da je more bit popodne bil kupit malo paškoga sira. Boj, ja san se na kuševanju vina šnjin malo i sulacal, tobože, da se mlado vino najbolje kušuje uz par fetic pršuta i paškoga sira. A i domaće ulje na isti mod.

 

I nebudi len, gren ja jopet kod njega, da vidin ča me zove. Pasivan va kuhinju, šapaher gori, nutri je teplo, a na tavli vidin lipi komad od špeka. Unako jedna pedalj dug i pedalj širok, a šari baš kako triba.

- Ma kadi si to kupil?- pitan ga ja, a un mi govori neka najprvo kušan. I jesan, ma dočim san prvi komadić stavil va usta vidin ja da je to niš specijalnoga, da to ni onaj špek od butige - a ne!

I unda mi un povida da je potle točenja malo redil po konobi i da je med luk i kapulu, gori na gredi, na brukvi našal obišen taj komadić špeka.

- A to da je špek koga je un sam učinil i to lani ovo doba. Vas je bil pišljiv i ma šćeto da ga je grubo bilo za vit. Otil san ga hitit ća, govori un, kad podušin ja njega, a un duši kako rožica. Sve san očistil i va vodi opral i evo ga, pune su ga usta kada ga ideš.

 

I pojli smo mi više od polovice toga gušnoga domaćega špeka i popili još jednu litru mladoga črnjaka. A un se je unda zavećal da će ove godine kupit, ne jednu, nego dvi vele table mesa i da će ih obe dvi posolit. Dva dana va sol i van na buru!

A ja mu nato govorin: - E, a unda bi se i šemprije moglo dogajat da ti zvečera, ne samo uši nego i obrazi začrljenu. Dabome, a more bit, ki put i meni!

 

Joso Fafanđel za Kanturnić, 15.11.2019.

Pročitano 510 puta

seakayakcroatia