Ala šu, jednaput va stara vrimena da je to ime dobil poradi prošnje i mižerije, ali evo, danas govoru da mižerije više ni, a prošnje još i manje. Svi smo bogati, svi smo va mekomu bumbaku, va svili i svi da va taškamin držimo puni takujini. I ne samo to, nego da i država svaki dan sve više samo gre naprvo. Kako se ono reče, da svakoga dana sve više napridujemo.

Dabome, ma ni se lipo z mižerijon rugat, a valja priznat da vele mižerije i ni, a ni misec prosinac, da ga danas kršćujemo, zasigurno se tako nebi zval. Ma jopet z druge bande se isto ne more reć da nan odasvud teku samo med i mliko. Varamente, naše vlasti se navelo falu kako te ovo, te ono pomalo gre naprvo, ali jedina i najveća falinga je ča mi ljudi to na svojoj koži ne moremo šervat. Boj oni ki živu od penzije, njiman se čini da su penzije sve manje i manje. Ako malo i narastu, niš od toga, boj nimaju moći, nimaju force. Ako i primiš malo veći kupčić šnjin se more sve manje kupit. I to je najbolji metar ki govori kadi smo i ča smo.

Svi se boru, a pravde ni!  

I tako jedni njurgaju, a drugi muču. Muču oni ki imaju dobre plaće, a njurgaju recimo učitelji, makar puno od njih zna reć da ni oni nimaju baš jako mizerne plaće. Ma jopet, kuliko se more šervat, učitelji se više bunu na nepravdu nego na male plaće. Oćeju da in se dignu koeficijenti i da nati mod budu jednaki kako i oni drugi. I tako se igraju putezanju konopa – učitelji putežu koeficijent, a vlasti se držu za dizanje plaće. Da san ja sudac ja bi to lako rešil. Učitelji neka pristanu na jedan del od dizanja plać, a drugi del neka država reši kroz dizanje toga nesritnoga keoeficijenta. Ali vlasti nedaju ni blizu koeficijenta, pa se sve pitan da kakova je to sajita paklena va tomu koeficijentu, kakova je to mina, oli ona starinska bumba sumporača. A ni to nikakova mina, govoru učitelji, nego da oni samo oćeju bit jednaki kako i drugi, ča oće reć da se više boru za pravdu nego za vele plaće. Nati mod bi se moglo reć, da vlasti više nudu plaću, a za pravdu da ih ni briga.

Da, a takova su to vrimena arivala, pa se svi pomalo pitamo da kadi je nestala ta nesrićna pravda, kadi je kvragu šla? A svi se tobože za pravdu boru – i država i pulitka, a dodar i crikva, dabome. Svi se boru, a pravde ni! Pa se čovik više puti pita da ča se to dogaja i kadi ćemo nati mod arivat? Boj, ako jednoga dana pravda zasvin nestane, a ne – neće bit dobro!

Po širokomu tapunu

Ma jopet, ima puno od njih ki i naprvo duron navijaju kako nan je sve bolje i bolje. Boj, sve da raste: i budžeti i privreda i dohodak i plaće i penzije, ma sve redon. Sve je to lipo, ali zaburavljaju da od svega toga najviše rastu tlak od krvi, žile patu, srca zakažuju, a i možjani da su nan sve više na tankomu ledu. I ča se unda dogaja? A evo, lipo ariva kanata od godine, božićni blavdani, Nova godina i sve tako redon. I dabome, unda nan po celoj državi (kako i po svitu) parićivaju oni veli, lipi i svitli Adventi. Pa Lošinjani govoru da je njihov najbolji, Ričani da je jopet njihov, a Bandić va Zagrebu najviše od svih fali svoga. Ma isto su i naše vlasti od Raba ove šetemane šli malo va Zagreb kod njega, tobože, da mu reku kako je naš rapski advent bolji od njigovoga. A Bandić se je, dabome, kako i vajk po svoju snašal, pa je rekal da je Zagrebački advent najbolji na kraju, a naš na Rabu, priko mora, na otociman. A mi ki idemo sve to pogledat (najviše po škuromu) i mi isto moramo priznat da je sve jako lipo za vit i da je gušt kroz onaj parkić se malo prošetat. E sad, a kuliko od toga čoviku more bit laglje va životu, to je već drugi par postolov.

Računan da sve ono ča je lipo za vit i ča dušu okripljuje, da sve to malo čovika i liči na svoj mod. Jedino je vrag va čoviku ki se unda isto pita da kuliko sve to gušta, kuliko je vato šodli potrošeno. Tobože, ma najviše za oni pivači i pivačice ki ne maru za koeficijenti, nego gulu šoldi, kuliko ih je volja. I sve je to lipo kad bi šoldi bilo za sve ča bi se otilo. Ali evo, i ove šetemane da su naši zglasali novi budžet, tobože za onu drugu godinu, a to je kako jedan veli libar od svemogućih potrib i šoldi ki sve to pokrivaju. Nisan imil prliku taj libar malo prebrat, ali to van je tako. Ima tamo vajk i velih i malih stvari. Jedino ča šoldi nikad ni za sve potribe. Pa unda malo pomore i Turistička zajednica. Intanto, za pivači ima šoldi ki se toču i po tapunu, ali kada domaći čovik pita za domaću potribu unda jedva otvoru onaj doljni mali čepić. Ako ga i očepu – ve! Boj više puti in se i neda tu velu bačvu po čepiću načimat. Ne, nego cicaju na gumu ozgora – po širokomu tapunu

Pod tanku dekicu

A čitan ovih dan da se va Riki boru da bude ča manje beskućnikov, tobože, onih ki nimaju ničega, pa spu po vanu na zraku. I sada su organizirali solidarnu akciju va koj će ovih dan jedna grupa ljudi jednu noć šnjiman zajedno spat vani, pod samo jednu tanku dekicu. A ja san unda promislil kako bi bilo jako lipo da svaki od nas, a baren jednu noć po zimi va prosincu, prespi vani pod kakovu malu dekicu. A oni na vlasti, ki nedaju šoldi po čepu, a cicaju po tapunu, oni bi mogli prespat i po dvi noći vani. I to bez dekice!

Joso Fafanđel za Kanturnić, 2.12.2019.