Foto: RabDanas
Mi smo unuko hurbasti kakovi već jesmo, najprvo smanjili red vožnje za trajekti. Pari mi se da su samo četri put dnevno vozili, pa su se šoferi od nabave jadali kako in je to malo, boj da moraju dugo čekat za doć na Rab. E, to se je more bit i koroni dogajalo – arivala bi ona do Stinice, ali trajekta ni, pa ki će vrag čekat za pasat priko. I unda bi se lipo obrnula i šla bi naprvo kuntra Zadru. I tako, celo vrime ni je bilo na našemu Rabu.
Evo uvako: najprvo san pasanoga utorka po prvi put čul na Rabu črška. Ma i to kako da se ove godine napak dogaja. Čul san najprvo onu malu čačicu, oli kakaru kako to Banjolci reku, a tekar drugi dan san jopet čul onoga črška ča ga mi zovemo črljenčić i ki piva unako na dugo, a ne ono ča-ča-ča, kako spomenuta čačica, oli kakara. Ali, ala šu, kako je da je ma i črški su začali svoje pivade, a to pari da koronu triba poslat kvragu, tako da pomalo sve gre na svoje i da arivamo va onu rutu kakovu smo svake godine imili na ovomu našemu školju. I zato ću reć uvako: eto, čul san i prvoga črška, na svu sriću vidil san na moru i dva -tri glisera, kuntrivan sve više i auti, oni s tujiman tablicamin, a svajdi kadi arivan sve manje vidin one maske na obrazu, oli trubice po domaću.
Govori mi jedan čovik ovih dan kako se je od srca nasmijal kada je pročital da ja spominjen trubice, a ne maske. Oštija, a ima un i pravo, boj to su zazbilja bile trubice, ke bi naši stari stavljali janjčiću, jariću, oli va ono još starije vrime i mladomu telčiću na usta da ne bi po noći sve mliko pocical materi, pa unda jutro ne bi bilo za dicu i fameju. Tako bi, recimo, jadan jarić celu noć tukal z njuškicon po vimenu od matere, ali ne bi mogal ćapat cicu i poćućat mliko. E, nati mod smo i mi ljudi stavljali turbice na usta da ne bi mogli koronu poćućat. Oli ona nas, dabome. I evo, vime od korone nismo poćućali, ostali smo živi i zdravi.
Celo vrime korona ni mogla na Rab koraknut. A ja san se sulacal da i ne more. Boj mi smo unuko hurbasti kakovi već jesmo, najprvo smanjili red vožnje za trajekti. Pari mi se da su samo četri put dnevno vozili, pa su se šoferi od nabave jadali kako in je to malo, boj da moraju dugo čekat za doć na Rab. E, to se je more bit i koroni dogajalo – arivala bi ona do Stinice, ali trajekta ni, pa ki će vrag čekat za pasat priko. I unda bi se lipo obrnula i šla bi naprvo kuntra Zadru. I tako, celo vrime ni je bilo na našemu Rabu. I neka je tako, neka nan gosti na miru arivaju, neka se apartmani pomalo nakrcivaju, neka je vit gliseri po moru i neka nan se nati mod tornivaju one slike i stanja ča su nan ne samo takujini napunjali, nego i životi činli bogatijima.
Ali ta vražja korona ne čini škodu samo na poslu, nego i doma po postiljah. Oštija, a ki je imil kuraja takat se z ženan, oli z divojkon, po postilji, kada su nas tirali da moramo bit a najmanje metar daleko jedni od drugih. I još su imili kuraja govorit da će korona popravit naše demografsko stanje. Tobože, da su ljudi doma i da će se unda više dičine rađat. A naki mod, ako se moramo jedni od drugih odalečevat. A jedino po duhu svetomu. Povidali su mi tako da su se muž i žena jednu noć isto odlučili malo poprtit jedan na drugoga. Ali vrag je strah, pa je žena vreda stavila na usta trubicu, a unda i un, a ča će drugo. Ali kada se je poprtil kod žene na postilju govori un njoj: Ženo, trubice smo stavili – i to je po propisu, ali ča ćemo i kako ćemo sada socijalnu distancu držat.
Joso Fafanđel za Kantunić, 31.03.2020.
