logo mix

Rab Danas

Nezavisni internetski portal otoka Raba

Četvrtak, 16 Srpanj 2020 10:51

Rapski kantunić Josa Fafanđela: TANCI OD KORONE

Napisao/la Josip Fafanđel
Ocijeni sadržaj
(1 glas)

Inšoma, ča se korone tiče vidite i sami ča se dogaja. Svi strahuju da i neće puno kalivat, nego da bi mogla bit sve jača i jača. I sada su nan sviman nabandali one vražje trubice, kroz ke varamente moremo dihat, ali mi se svako to malo orćali zamagljuju, pa ih duron taren, a to pari da ni oni nećeju dugo durat. I tako zaman govoru, da trubica ni skupa. Oštija, trubica ni ma su zato orćali ala vraga skupi.

 A ča se korone na Rabu tiče vidite i sami ča se dogaja. Najprvo da pokučin, boj kuiliko znan mi se na Rabu još dobro držimo. Ali cito ve, i ne vraga spominjat, oli bolje reć - ne vraga za rep putezat.

 

A jeste šervali da ni oni ča su slavili izbori, ni oni nisu puno za koronu marili, a i trubice su bili debandali. Ala šu, baren je to onaj ministar Beroš pošteno priznal. E ma zaman, boj tekar za dvi šetemane se more vit ki je koga z viruson zipljucal i kuliko će i to koroni dat jednu nogadu za naprvo. Pa se lako more dogodit da već prvu novu vlast moramo porivat va bolnicu. A to bi bilo grubo za čut, boj kad bi nas drugi pitali da kako naša nova vlast, a mi bimo morali govorit da nisu pri sebi - da su svi...bolesni.

 

Da, a ča se korone na Rabu tiče vidite i sami ča se dogaja. Najprvo da pokučin, boj kuiliko znan mi se na Rabu još dobro držimo. Ali cito ve, i ne vraga spominjat, oli bolje reć - ne vraga za rep putezat. Ma naokolo, po celoj državi, stanje je drugojačije i ono ča čujemo svaki dan baš me jako i ne veseli. I ne samo da me ne veseli, nego me još i ljuti i jada. Oštija, a najviše da se sada korona zbuđuje po oniman kluboviman ča tancaju po noći, po zabavamin od mladih, a još najviše od svega na veliman pirovanjiman, na kiman se tancaju niki vražji vlakići. A ono ča se va škuribandi dogaja to niki ne spominje. A tamo je korone puno više nego va tomu vražjemu vlakiću. Ne, va škuribandi ni distance.

 

I tako se ja pitan da ki je vrag dal napamet oniman va Dalmaciji, oli malo zgora, da va ovo doba godine i još va forci od korone, parićaju pir na komu se je skupilo, ma ča mislite, ravno kolo 300 ljudi. Ako ćemo pravo, najprvo je vela bedastoća i čint tako velo pirovanje, pa za tu šordariju i trošit tako veli šoldi. A druga je tirada da je korona kolo nas i da se svi redon moru zarazit. Pa kuliko iman navar, jušto se tako i dogaja. I sada su svi va strahu. Ali tobože, da ni važno, nego da je najvažnije od svega da su oni svoju dicu pozakonili. Oštija, a to unda jedino pari da je bila jako vela preša za učint ženidbu. A ča nato reć nego onu kiticu ča san na jednoj kartici odavna već zapisal, a ku su mi drugi farabuti povidali. Kitica gre uvako, da prostite: Kad se dojde guzici za posrat i divojki za udat - to niki ne more fermat. Pa unda ča reć nego - kvragu i trubice i korona.

 

Joso Fafanđel za Kantunić, 15.07.2020.

 

 

 

 

 

Pročitano 463 puta

 

 RAT1 600

seakayakcroatia

 

BANNER350 BarbaSIME1