Home Beseda po domaću Rapski kantunić Josa Fafanđela: FORCA ŽENSKE!

Rapski kantunić Josa Fafanđela: FORCA ŽENSKE!

0
Rapski kantunić Josa Fafanđela: FORCA ŽENSKE!

Foto: RabDanas

 

Ako sve ono ča je va ženskoj komandi (a najviše je tako), ako sve to gre kako triba, enti ladra, a to unda pari da sve ono ča ne valja, da je to jedino ono ča mi muški držimo va rukah. Nati mod se nebi tribalo čudit, ako se jednoga dana dogodi da na Rabu naše ženske zazbilja učinu samo njihovu- tobože žensku stranku.

Rab danas oglas

Kuliko moren šervat do sada ih ni bilo puno va pulitici. E, ali jopet z druge bande, neka nas to ne popelja na krivi put. Boj znate ča, još puno prije izborov, jedan naš novinar pobrojil je kako kod nas na Rabu najveću komandu držu ženske. Dabome, ne va pulitici, a bojin se ne i doma, nego najviše tamo kadi triba laurat.

 

A ja san se ovih dan latil to nanovo brojit, pa na kanati nisan mogal virovat da je i dan-danas stanje propijo isto. Evo, prije nikulko godin imili smo žensku i va komandi od grada, pa su je potle obalili, ali je zato sve drugo ostalo kako i prvije.

Evo, pratite me ča govorin: Ki va rukah drži bolnicu va Kamporu? A ženska, dabome. Ki komandu drži va našoj srednjoj školi? Ženska! A ki va onoj osnovnoj školi? A jopet ženska! Ki je na komandi va Pučkomu učilištu? Isto ženska! A ki pelja naš vrtić od dice? Ženska! Homo naprvo: ki vodi našu Grasku knjižnicu? Jopet ženska! A ki drži cvetarnu? Ženska, dabome! A ke pelju one vridne udruge: Mociru, Pinokio i Kocku? Sve redon ženske. A ki je glavni va Udrugi od penzijonerov? A ženska, a ki će! Imamo na Rabu ne jednu nego tri apoteke. A ki va njiman drži komande? Va sve tri ženske, dabome! A ki nan sudi na oba suda? A jopet ženske! A i Turistička zajednica je va šaki od ženske.

 

Ma ima brate moj još toga. Ja san siguran da i nisan sve pobrojil. Ben, ma i ovo je dosta da se more reć kako je najviše toga na Rabu va rukah od naših ženskih. A ja bi diboto još i to rekal, da jušto sve ono ča je va njihoviman rukamin, sve to manje-više i jako dobro kuri naprvo. I zato – kapa doli ženskamin!

I pazite malo, slušan puno muških kako se jadaju da kod nas na Rabu, a diboto niš ne gre kako Bog zapovida. Oštija, a nati mod ti muški, a i oni muški va pulitici, govoru drito sami kuntra sebe, oli kuntra svih nas muških, dabome. Boj, dabome, ako sve ono ča je va ženskoj komandi (a najviše je tako), ako sve to gre kako triba, enti ladra, a to unda pari da sve ono ča ne valja, da je to jedino ono ča mi muški držimo va rukah. Nati mod se nebi tribalo čudit, ako se jednoga dana dogodi da na Rabu naše ženske zazbilja učinu samo njihovu – tobože žensku stranku. Da, da, to se lako more dogodit, boj i unako već sada one vodu 1 kuntra 0, a najbolje da unda zemu i celu komandu pa više nećemo njunjat da na Rabu niš ne gre kako Bog zapovida.

Forca ženske!

 

Joso Fafanđel za Kantunić, 7.08.2020.

 

 

 

 

 

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime