Foto: Foto: Adriana Kaštelan
Z jutra malo je friškije, burinac pomalo zdiše, na nebu ki mali beli oblačić, a nebo plavo kako oko od najlipje divojke. A po nebu manje avijoni navigaju, a sve više one male šesne lastavice ke se zalećuju i naglo tumbivaju za ku mušicu va zraku agvantat. Po danu bi jopet malo zateplilo, a z večera se ona modra ćareca pomalo pretvara va rumenilo, va črljeno nebo od zalaza sunca – va miljar črljenih luzari – kako san to jednaput va jednoj pismi već zapisal. Da ne rečen da se pridvečer sada već more i kakovoga boljega arbunića prevarit, a zausput se i ki širunić na udicu zaleti. I eto ti ga unda, ne jedan nego dva gušta – gušt od lova i drugi dan gušt od friške ribe na tavli za ubrok. Za prsti polizat.
Inšoma, tako van to gre. Dokli jedni va svemu tomu uživaju i koristu taj dar od prirode na našiman školjiman, dotle drugi tuguju, boj ne moru gledat kako gosti pakuju svoje torbe i pomalo parćuju svojiman kućamin. Jedni redovito, a drugi jopet i prije vrimena, boj da in ona vražja korona teče za petamin. A kuliko moremo šervat sve više ona teče i namin za petamin, boj ono kad čujen da ih je po 350 novih va jednomu danu, to mi se njanci malo ne pijaža. Varamente, a ča triba i govorit, boj evo, kanata je od agušta, a to pari da smo i do devetoga miseca arivali. A va ovomu štajunu i prvije je bilo manje gosti na Rabu. Manje, ma isto više nego ove godine.
A ča bimo otili? Ako je korona sve to napol učinla unda moramo bit kuntenti ako je i sada na Rabu gosti za polovicu manje nego lani. A ne, ove godine se ni ča uhat, kako smo to znali govorit, puno boljoj posezoni. Poradi bolešćine sve je šlo napak već od začetka, pa i zonin ča bude, moramo bit i više nego zadovoljni. I jedno je sigurno – gosti ćeju pomalo uteć ća, a koronu će ju namin ostavit neka se sami šnjan borimo. I ni nan druge nego oćemo, jedino nebi volil da me oni svemogući Stožeri va kuću zaklopu. I da nas natiraju da i va kući moramo trubice nosit, oli nedaj Bože, i po noći kada se s paronon va postilju zatačen. Dabome, sulacan se, ma isto – nikakor kako da nan se po zimi grubo piše.
Da, ma smo zato po leti dobro pasali. Ni za virovat, ma kako da su se i naši mladi od divojak ovoga leta dricivali. Boj, oni po Dalmaciji i Slavoniji da nisu držali distancu na piriman i noćnomu ludovanju pa ih je korona vreda agvantala. Ne pačan se, ma ne znan naki mod su to naši mladi zdurali, boj nač brate moj trači ako se mladi kuntraju pa unda držu onu vražju distancu od dva metra. Ala šu, po rivi se to još more, ali kada na kraju zavrnu nutra va onaj malo škuriji parkić od Dorke, bojin se da se ona dva metra vreda pretvoru va niš. Ali korone na Rabu ni, a to unda pari da su se naši domaći mladići odlučili više za distancu nego za grljenje i tumbulanje z divojkamin. I vrag će ga unda znat ča je tude po sredi, pamet i disciplina, oli da ovi dananšnji mladići više nimaju volje za divojke va gušćac popeljat. A more bit da su samo va strahu. A i neka su, boj korona neće za vajk durat, a vrimena za škuri kantuni je uvik bilo pa će ga i naprvo bit.
Joso Fafanđel za Kantunić, 28.08.2020.
