logo mix

Rab Danas

Nezavisni internetski portal otoka Raba

OLUJIC 1400X179

 

Petak, 18 Rujan 2020 07:01

Rapski kantunić Josa Fafanđela: MALA GOSPA I PAROLA OD LJUBAVI

Napisao/la Josip Fafanđel
Ocijeni sadržaj
(1 glas)
Rapski kantunić Josa Fafanđela: MALA GOSPA I PAROLA OD LJUBAVI Foto: Hrvoje Hodak

Mala Gospa je za Loparani dupli blavdan; i dan od Općine i blavdan od Male Gospe. Ben, ma odavna već, i ja nikakor isto iman nauk malo se tamo zaletit. Svi su prije toga govorili da će ove godine poradi korone i Lopari bit puno manje dogajanja. I je, ni bilo ni pečenoga vola, a ni onoga veloga šatora tamo na sazmorcu, pa unda ni tanci, dabome. Inšoma, bile su mise - i jutro i popodne, a i onaj veli sajam na bancima ni preskočen. Ma i to se je govorilo, da će ove godine bit mali sajam, tobože, puno manji. Ali ni bilo tako, nego me je znenadilo kuliko je bil veli, ma diboto isti kako i lani.

 

...na timan banciman od sajma vajk čoviku badne va oči nika stvar ča mu je doma za potribu. I tako, nisi se ni okenul kad evo ga na - ode za tren dvisto, oli i tristo kun. Za šuškarije, ne migo za vele stvari. A to i je moć od svakoga sajma, pa i od ovoga loparskoga. 

 

I sve san to i ja malo pošpijal, pa pomalo doma. E, ali kada san hodil Lopar, nisan mogal a ne vit, ona vela modra slova na onomu zidu prid njihovu novu dvoranu, ka se varamente još dohinjuje. Ma vela slova, a diboto malo manje od pol metra. Malo san vreda zabrenzal auto i čitan ja, a tamo piše otprike uvako, boj nisan mogal svaku rič zapametit: Ja san za tebe spreman sve zgubit. Samo ti Anđele... mladić je šoto nadodal lipe besede od one pisme od našega Dragojevića. Ono, tobože, da su njih dvoje jedan za drugoga kako stvoreni. Eto, a puno od njih ni, more bit, to njanci ni šervalo, a morali su, boj je to napisano po celoj mociri, a diboto kolo trejset metri dugo. E, ali mene, mene je to jako razveselilo, boj to i je ona prava ljubav. Svojoj divojki va tako malomu mestu napisat tako velu parolu na samiman vratiman od Lopara, e takovoga kuraja nebi svaki mogal imit. A je to zato ča ga je divojka ostavila, oli ča drugo, vato se ne pačan, ma ljubav ni sakrijena nego je sviman dana navidelo. Pa ako ga je divojka i ostavila, kada to vidi, tu silu od ljubavi, more bit da će mu se i nazad tornat. Jedino mi se ono ne pijaža, tobože, da je un poradi nje - spreman sve zgubit. Nedaj Bog mladiću! Sve da, ma samo čuvaj svoj život. Boj neće dugo pasat da ćeš i drugoj divojki jopet tako lipu leteru napisat.

 

Inšoma, ta vela i lipa parola od ljubavi, to je bilo prvo ča me je Lopari razveselilo. Potle san se zaletil malo na sajam, pa san i tamo bil kuntenat, boj su me napumpali da će ove godine bit samo par banci, a ni bilo tako, nego je kako i vajk, svega i svačesa tamo bilo nabandano. I dabome, na timan banciman vajk čoviku badne va oči nika stvar ča mu je doma za potribu. I tako, nisi se ni okenul kad evo ga na - ode za tren dvisto, oli i tristo kun. Za šuškarije, ne migo za vele stvari. A to i je moć od svakoga sajma, pa i od ovoga loparskoga. 

 

Jušto i zato puno ljudi i voli za Malu Gospu poć Lopar. Prvije, va ona stara vrimena ljudi bi hodili tamo i kupit od Ličana one starinske gumene postole, ča smo ih zvali gumenjače. A danas ima tamo i svake sorte mudernih postolov. Ma jopet, meni je za vajk ostala draga ona šesna anegdota kada je jedna lipa i mlada Loparka došla prid banak od jednoga brkatoga Ličanina, boj je otlila kupit škartočić one boje, kako se to po starinsku reče - črva, za očrvit bičve ča ih je sama uplela. I pita ona toga, već starijega Ličanina: Barba, a imate vi more bit črva? A un da se je unako muški nasmijal, pa da je govori: E, lipa moja, a di si dosad bila?! Sad imam samo - črvića!

 

Joso Fafanđel za Kantunić, 11.09.2020.

 

 

 

 

 

Pročitano 943 puta

 

 RAT1 600

seakayakcroatia

 

BANNER350 BarbaSIME1