Foto: Foto: Ervina Pahljina
A ja kada čujen čovika da reče kako mu je dosadno, ja to ne moren razumit. Čovik ima vajk ča to za čint, a pugotovu po danu. Ja ako baš niš i niman, oli mi se ne da, unda seden vani na onu moju katridu pod čimpreson, pa gledan kako avijoni letu, oli špijan ki sve tići priko mene preliću. Pa mi peteh zapiva, oli se dvi maške zaigraju. Da, a vi se nato ne mojte smijat, boj sve je to čiviku za lik i potribu. Oštija, a lipo se ono reče – da ki umi, njemu dvi
A po zimi, mi se na Rabu sve više i više zatvaramo va kuće. Ložu se špaheri, pećice, centralno, oli već ča ki ima, pa se pruntivamo kuntra televizije, virimo va nju, gleda se sve redon – od diteškoga programa, priko vijesti, do svakojake one vražje serije. Dabome, niki voli ovo, a niki ono drugo, pa se šempre znamo s paronon, oli z mladiman i pokarat. Parone, recimo, oćeju seriju, a mi oćemo nogomet i eto ti vraže rata. Dabome, a ni baš ni nogomet nika vela preženca, ma jopet i one serije su isto ala šuć-muć. Gedaš pa prekinu kada je najnapetije, a unda naprto čekaš drugu, tobože, da ča će bit.
Inšoma, to su van ti naši zimski dani, kada više od njih ne znaju ča će ju sami sobon, dosadno in je, pa ako ni nogometa i televizija ih pomalo jada. A ja kada čujen čovika da reče kako mu je dosadno, ja to ne moren razumit. Čovik ima vajk ča to za čint, a pugotovu po danu. Ja ako baš niš i niman, oli mi se ne da, unda seden vani na onu moju katridu pod čimpreson, pa gledan kako avijoni letu, oli špijan ki sve tići priko mene preliću. Pa mi peteh zapiva, oli se dvi maške zaigraju. Da, a vi se nato nemojte smijat, boj sve je to čiviku za lik i potribu. Oštija, a lipo se ono reče – da ki umi, njemu dvi
Korona nan duron priti, dabome, ali mora se a baren na butigu poć po ono malo provište. Tako ovoga pasanoga utorka gremo ja i parona kod nas, va našu butigu. A ja nisan ovoga puta ni kaić spaljal, pa smo se dogovorili: Ti hodi va butigu, a ja gren kaić spaljat, pa ćemo se nać va autu. Ali nisan ja ni polovicu spaljal, a evo ti nje na mulu. Ča je?, pitan ja nju. A ča je!, govori ona, ni ča od provište boj je butiga zatvorena. Morat ćemo do Grada, oli Lopar.
– A zač je zatvorena?, pitan ja.
– Piše da je inventura, govori ona. I još san samo par ciglji vode hitil van od kaića, boj ni druge nego valja poć va drugu butigu.
– Ala za prominu, govorin ja njoj, homo malo do Lopara. I šli smo, kupili smo va onoj veloj butigi ono malo provište ča je tribalo i gremo na blagajnu, kad ehe! makina od blagajne je zablokala. Ona druga ženskica je vreda, na prešu, onu drugu otvorila, ali zateče se prid nas jedan Loparanin, pa mi odmah zada njega. Ja znan ki je, dabome, ali to ne smin reć. Diže un od one nabužane kašete pomalo robu gori na pult, ali ja san šerval da mu je nikakor teško kalivat se i dizat. Ali sve je digal, samo su va kašeti ostale jedna botilja od dvi litre beloga vina i jedna bočica od pive. A ja san se unda sprignul da mu pomoren i to dignut na blagajnu, ali un je vreda skočil pa mi govori: – Ne, ne – prijtelju, to ne! To ću ja na drugi račun.
– A to pari da ti kupuješ provištu i za suseda, govorin mu ja.
– Ma ne, govori un spod glasa meni, nego ovo prvo je provišta i račun za ženu, a vino i piva je provišta za mene, a ona za ovo ne smi znat.
Platil je un i jedno i drugo, gre ća i govori mi na kanati: – Četrdeset i dvi godine smo va braku ja i moja parona, ali još mi neda mira. I žmulj vina moran od nje sakrivat.
A unda je šerval da san i ja z mojan paronon na blagajni, pa mi hodeć govori: – A vidin ja da si i ti oženjen, pa ti niš ne moran govorit. Ti ćeš me najbolje razumit.
A ljudi govoru da in je dosadno. Eto, a i male stvari nas moru razveselit. Da ne govorin kako mi je jedan prijatelj od Banjola poslal i uvakov sulac. Va jednoj župi da je bil stariji velečasni ki ni volil da se va Crikvi, a pugotovo ne na spovidi, priko ust prehićuju grurbe stvari i pogane besede. Zato je priporučil svojiman župljaniman, da recimo kada dojdu na spovid, ako imaju potribu za reć kakovu poganu besedu, oli grih, neka to reku ne drito nego na drugi mod. Tobože, da to more bit i va šiframin. Recimo, ako je žena prevarila muža, neka samo reče da je pala, pa će ju se oni razumit. Ali ča se je jednoga dana dogodilo? Dabome, dobil je velečasni premeštaj va drugu župu, ali zaburavil je novomu mladomu popiću reć za one šifre o kiman se je un svojiman župljaniman dogovoril. I na prvoj spovidi već ona prva ženska ka je bila na redu govori njemu va spovidnici: Veličasni, pala san ( a to pari da je muža prevarila). I dabome, novi pop je vreda pita da kadi i kako je pala? A lipo, da govori ona njemu, vani zada kuće, po škuromu.
I tako sve redon; druga da je pala va konobi, treća pod niku smokvu, ali sve po škuromu. Mladomu popu to ni bilo ćaro, študijal je malo, pa je odlučil da poradi toga padanja triba poć kod gradonačenika. Hvaljen Bog, velečasni! A kojim doborom vi kod mene?, pita njega gradonačenik. Pomoz bog, nije dobro gradonačelniče, govori njemu pop, vi kako vlast morate pod hitno ča to učint, da se ovo vaše i naše mesto malo bolje osvitli. A zač?, pita njega gadonačenik. A zato, govori njemu velečasni, boj vaše i naše župljanke po škuromu sve redon padaju. Ma kako to?, pita gradodnačelnik. A lipo, govori njemu velečasni, evo, samo da van rečen kako je i vaša žena isto- već par puti pala.
Joso Fafanđel za Kantunić, 13.11.2020.
