logo mix

Rab Danas

Nezavisni internetski portal otoka Raba

OLUJIC 1400X179

 

Ponedjeljak, 01 Ožujak 2021 14:51

Rapski kantunić Josa Fafanđela: NOVITADI

Napisao/la Josip Fafanđel
Ocijeni sadržaj
(2 glasa/-ova)
Rapski kantunić Josa Fafanđela: NOVITADI Foto: pgz.hr

Ako ćemo pravo, o jušto pasanoj šetemani se već more govorit i na drugi mod. Ma ne poradi korone i pulitike, nego jedino poradi vrimena. O da, pasana šetemana je bila darežljiva po lipomu vrimenu, tuliko lipa, va suncu i teplinji, da je sve ovo kolo nas počalo pomalo već tračit na proliće.

 

Da, ni traga od zime. I, dabome, kada je lipo vrime unda i ja iman nauk malo učint jedan đir po gušću, a odlučil san se nato, na mod da ne samo upren malo više oči nego i uši. Pa ono ča mi je priroda ponudila, a ja san z naprtin očima šerval, to su bile tri novitade: najprvo san vidil da su procvetale prve ljubice, oli vijolice po domaću, pa unda da se i uljka i jabučica nadimaju za cvast, a medanji kaj tadi je i ona žuta pukavica već napol procvetala. I ča je to unda nego proliće! More Vakula govorit kuliko oće da će mrzlinje bit još, ali ki je to vidil da čovik više viruje njiman nego prirodi.

 

...potle dugoga i teškoga poroda, intanto je počal delat i onaj naš Dom za starije peršone. Ben, ma i to je lipo za čut, makar se o tomu malo toga ima za reć, boj smo kroz pasanih desetak godin već puno i doznali. Da, bile su to duge i teške porođajne muke, ali ni bilo carskoga reza, makar smo pupak još prije tri godine presikli.

Bit će mrzlinje, dabome, a i marčene bure još moraju zapuhat, ali neće to više bit onaj štajun od zime kada se voda ledi po potićiman, oli kada ruke i uši zebu. Sve će bit teplije, pa i bura, makar bila i jača. A zna bit. Da, jušto to navišćuje priroda i njoj valja najviše i virovat. A da ne rečen kako san va gušću i uši naćulil, pa san čul kako i tice već pomalo začimlju pivat one svoje prolićne pisme. E, ma kako san ih samo z gušta i poslušal!

 

Kad drugi dan naletih na još jednu novitadu, a to je da je potle dugoga i teškoga poroda, intanto počal delat i onaj naš Dom za starije peršone. Ben, ma i to je lipo za čut, makar se o tomu malo toga ima za reć, boj smo kroz pasanih desetak godin već puno i doznali. Da, bile su to duge i teške porođajne muke, ali ni bilo carskoga reza, makar smo pupak još prije tri godine presikli. A sve to pročital san va novinah, dabome, makar vreda moran reć kako je Hrvoje već va naslovu rekal, tobože ne da je Dom otvoren, nego da je prvi stanari ovih dan primil. I to je jušto ono pravo, boj kuliko ja pametin taj smo dom otvorili još prije tri godine. Da, da, bili su tamo i pulitičari, a i ljudi ki su to otili vit. Dabome, bil san i ja, pa niki ne more reć da ni tako bilo. Bilo je i puno govorancije i mužike, ako se ne varan presičena je i ona kurdela, pa smo svi mogli i nutra pasat. Pasal san i ja, ma ni mi se na prvu to nutri baš jako pijažalo. Lipo je, a i novo piturano i novi nameštaji i lipe slike po zidima ča su ih naši amateri darovali, ali - sve mi je nikakor bilo malo kako previše usko i stišnjeno. Puno mobilje, a malo mesta. Ali pasal san priko toga, boj, a ki zna, more bit da za starijega čovika tako i mora bit.

Oštija, ako je sve usko, unda je laglje kada čovik pade, boj se more ćapat za ča to kolo sebe pa se more šaldije i dignut.

 

Sve more bit, ali najvažnije je da je Dom otvoren i da će malo po malo primit kolo 35 stanarov. Va muci se je jadan rađal, ma evo, intanto se je rodil. A i drago mi je da je otvoren va drugomu misecu, a ne sada va ovomu marču. Oštija, za marač se reče da je munjen i klavrni misec, pa unda nebi bilo dobro da se još ka nova ludorija kolo te kuće dogodi.

I jušto zato, i kući i stanariman - neka je sa srićon!

 

E, ali jednu san novitadu preskočil. Nisan ove godine ni besede napisal o Valentinovu. Makar o tomu ni ča puno ni za govorit, boj to je jedna zmišljena i to tuja, a ne naša užanca. Ala šu, ma isto je lipo kada se ljudi volu i bušnjuju, makar se meni pari da je tudi više onoga ča se glumi, nego one prave ljubavi. Ženamin i divojkamin kupuju se rožice, dilu se bušnjade i činu veselice. Ma ove godine je i to, kako i sve, šlo pomalo napak. Korona je i tu užancu dešvala. A more bit da je i bolje tako, boj na taj dan od Valentinova ljudi se naviše bušnjuju da ih drugi vidi. Tobože kako se oni volu i poštivaju, ma kada niki ne gleda, kada su doma sami, unda se medase manje rivaju z bušnjadamin. Popazi se televizija pa svaki na svoju bandu na postilju i to okrenute guzice, da prostite.

 

E jušto zato san se i ja ovih dan ma šćeto z gušta nasmijal kada san dočul ča se je med jedniman malo starijiman dogodilo. Finila je na Valentinovo televizija i ode ded va sobu spat, a baba je još malo ostala da ča to poredit po kući. A kada je i ona arivala va sobu govori njoj ded: Stara moja evo, sukal san budande! A ona da mu nato govori: Ala, ala lipi moj, neka si, pa ću ti ih zutra oprat.

 

A živilo Valentinovo! A ča drugo.

 

Joso Fafanđel za Kantunić, 1. 3. 2021.

 

 

 

 

 

Pročitano 1179 puta

 

 RAT1 600

seakayakcroatia

 

BANNER350 BarbaSIME1