logo mix

Rab Danas

Nezavisni internetski portal otoka Raba

OLUJIC 1400X179

 

Petak, 12 Studeni 2021 17:43

Rapski kantunić Josa Fafanđela: GLUMCI

Napisao/la Josip Fafanđel
Ocijeni sadržaj
(1 glas)
Rapski kantunić Josa Fafanđela: GLUMCI Foto: Hrvoje Hodak

Ala šu, ne doznaje se redovito kuliko na Rabu ima korone. Jedni govoru trejset, a drugi i tristo. Oštija, ma da je to istina sve bi nas redon va kuće zalokotali. Ala šu, ja se tobože malo i rugan, makar ta nesrića od korone i ni za rugat se. Nadan se, dabome, da je ni tuliko na Rabu, ali vrag ne spi pa more bit svega.

 

A i va celoj državi je stanje jako grubo. Već smo i sedan hiljad pasali. I unda oni od Zagreba na svih jednako trubu, a zanemaruju da je va Zagrebu na kupu, a diboto jedan milijun ljudi, i da se svakoga dana mišaju i rivaju - i na poslu i va tranvaju i po butigamin i veliman i maliman. I eto ti ga na i nove mire sada.

 

Ma mene muči ča su se i dičine ćapali. Školantiman pritu da će ih jopet stavit va onu školu od kuće ka se dogaja priko interneta. I svi se pitaju da ča ćeju jadna dica nati modi i moć naučit, pugotovo oni mići od prvoga i drugoga razreda. I presjednik Milanović se je sulacal, pa govori niki dan da i njigov sin finjuje osmi razred, a da još malo pa neće ni znat kadi mu je škola. A i drugi vici se od toga činu. Jednoga maloga da su otac i mat pitali da ča je danas od učiteljice naučil? Na onomu vražjemu tabletu, dabome. A mali da in govori, - a niš! A kako niš? - pita ga mat. A lipo, boj san ja pretisnul botun i učiteljicu san blokiral.

 

I tako, va jednu ruku, blago današnjoj dici. Boj i mi smo hodili va školu, ali moran priznat da unda školu baš i nismo jako ljubili. Zato bi vajk bilo velo veselje kada bi nan rekli da zutra neće bit škole. A danas vidite i sami ča se dogaja. Današnji školanti samo badnu onaj botunić i ode škola, ni je više. Pa se idu van igrat, ako ih ki nima navar. A ki će ih vrag i imit navar, kad su i otac i mat na poslu. I to po ovomu novomu vrimenu, a diboto od škuroga do škuroga. Jedino dedi i babe.

 

E, a ude kod nas na Rabu ne moru ih ni babe, ni dedi čuvat. A vidite i sami ča se va zadnje vrime dogaja. Sve babe i svi dedi na Rabu naumili su bit glumci. Da, da, dobro ste čuli - ni manje ni više nego glumci. Na Rabu da se snima niki film ki se zove Smrt divojčice sa žigicamin, pa oni od filma duron zovu ljudi boj da in tribaju za film. Ma vraga pakelnoga ćeju oni glumit. Oni samo šeću okolo i kolo glumcov se movu, ali tamo su. Ni ih doma, kadi dici triba pomoć, oli ih baren imit navar da ne blokiraju učitelja, oli učiteljicu.

 

A je, vrag se vara, ča ni bolje uvako. Lipo se obuku, unako više po starinsku, pa Grad na slikivanje. Malo ih slikivaju, malo sedu i pazu, a unda in još i jedan ubrok parićaju. A i žrnadu od 200 kun po danu da još dobiju. Ni puno, ma pet dan pa puta 200 kun i evo ti ga na, a diboto pol penzije. Altroke stat va kući i još se duron z dičinon gnjavit.

 

Joso Fafanđel - za Kantunić, 12.11.2021.

Pročitano 1111 puta

 

 RAT1 600

seakayakcroatia

 

BANNER350 BarbaSIME1