logo mix

Rab Danas

Nezavisni internetski portal otoka Raba

OLUJIC 1400X179

 

Ponedjeljak, 29 Studeni 2021 20:03

Rapski kantunić Josa Fafanđela: SVE POMALO KURI

Napisao/la Josip Fafanđel
Ocijeni sadržaj
(3 glasa/-ova)
Rapski kantunić Josa Fafanđela: SVE POMALO KURI @dadoarbaphoto

Ben, ma ča triba i govorit. Evo, va zdanji misec ćemo koraknut, a i godina gre pomalo na kanatu. Varamente, bolešćina nas i naprvo muči, ali evo prid namin su i blavdani.

 

Ali, kako prvo, da će ju nas posjetit Sveti Mikula i Ded Mraz. Svaka in čast da se baren oni korone ne boju. A Sveti Mikula najviše voli dilit pokloni, makar i mornari čuva i zaštićuje. Zato najviše i voli doć kod nas na Rab, ne va autobusu nego
z trajekton. Ben, ma naki mod un naviga to je njigov posal, a najvažnije je da donese pokloni i da nan dičina budu vesela i kuntenta. 

 

E a unda potle njega moral bi po užanci i Ded Mraz arivat na Rab. Neka brate pa će dica i njega lipo dočekat, a mi ćemo unako priko oka pošpijat ki je od njih dva više dari dopeljal. Vatramente, Dedu Mrazu je laglje putovat. Un nakrca one vele njigove saonice i parti pomalo krajen po snigu. A Sveti Mikula un mora imit navar da ga kakova nevera po moru ne trehi, a još i drugi brodi mora o tomu avizivat. A kuliko se čuje kod nas su ove godine i cene i porezi sve veći i veći, pa se bojin da će unda Sv. Mikula i manje poklonov donest. A Ded Mraz, un parćuje gori od Evrope, kadi je stanje bolje nego kod nas, a od tamo i pokloni nosi. To pari da bi njigovo brime moglo bit puno obilatije.

 

Ben, ma mene to manje poida nego jedna druga stvar. Niman se ča pofalit, ali reć ću van da san ovih dan i sedandeset i petu godinu doživil.  Da, za jedan koračić san stariji. Oćo, ma prvije bi rekal da to i ni koračić nego jedan veli koračina. Oštija, koračić je za dicu, divojke i mladići, boj njiman jedna godina više niš ne pači. Ma jako bi se ja poidal da misto dvajset iman dvajset i jednu! E, ali nakupilo ih se velo brime. Kuraja varamente još ima, ma grubo je za čut kada čovik grabi kuntra velomu računu.

 

Pazin ja niki dan na televiziji onaj kviz Potjera, pa govorin mojoj paroni: - Ma pazi malo, onaj na televiziji je rekal da ima 55 godin, a pari mi po izgledu, da je l0 godin stariji od mene...

- Ma ki?, pita ona mene.

- Čekaj malo, sad ćeš vit..., evo ga, onaj livo, govorin ja njoj, ča ne pari puno stariji od mene?

A parona ni dvi ni tri nego se okrenula pa mi govori: - Znaš ča, hodi lipo va kupaonu pa se na zrcalo popazi.

Ja san se tobože nasmijal, ma san se i zapensal. Ni mi se dalo dignut, ma jušto mi je došla hotada da malo i iden va zrcalo zaviriti. Ali, bolje je stat smiron, mislin se ja, a paroni san samo rekal: - Lipoga mi kuraja daješ, bolje da si mi nogadu zacipala!.

 

Joso Fafanđel - za Kantunić, 29.11.2021.

Pročitano 599 puta

 

 RAT1 600

seakayakcroatia

 

BANNER350 BarbaSIME1