logo mix

Rab Danas

Nezavisni internetski portal otoka Raba

Gif animacija za zapoljavanje 2000x240px

 

Subota, 11 Lipanj 2022 08:30

Rapski kantunić Josa Fafanđela: ČRŠKI

Napisao/la Josip Fafanđel
Ocijeni sadržaj
(2 glasa/-ova)
Rapski kantunić Josa Fafanđela: ČRŠKI Foto: Josip Fafanđel

Pita me niki dan Stanko Forić od Njemačke da ako su počali pivat črški. "Ude va Njemačkoj ja ga ne čujen", ruga se un. A ja mu odgovaran da nit ga tamo čuje, a nit će ga i čut, makar ih još ni ovo ude ne čujen.

 Pametin ja da bi vajk prvije od njih zapivali oni mići črški, ma malo veći od volovlje muhe, ča smo ih mi doma zvali sisići, a potle njih unda oni malo veći, ča smo ih zvali črljenčići, pa bi tekar malo prije Petrove zapivale kakare oli čačice, a na kanati i onaj najveći črčak koga vidiš na kolcu kako piva i drnda z guzicon.

 

"Ma kako to", jopet un navaljuje, "prvije bi ovo doba već odavna kakare organale!" A kakare su oni manji črški ča i pivaju ala "ča-ča-ča", pa ih zato polovica Raba i zove da su to čače, oli čačice, a ona druga polovica reče da su to kakare.

 

Ali, pametin ja da bi vajk prvije od njih zapivali oni mići črški, ma malo veći od volovlje muhe, ča smo ih mi doma zvali sisići, a potle njih unda oni malo veći, ča smo ih zvali črljenčići, pa bi tekar malo prije Petrove zapivale kakare oli čačice, a na kanati i onaj najveći črčak koga vidiš na kolcu kako piva i drnda z guzicon. I oni bi skupa, bez onih malih, po leti činli oni veli koncerti po boriman, črnikamin i maslinamin, koncerti kih volin poslušat z gušton, ala svega onoga ča je i lipo na ovomu svitu. Pivaju naši črški na vas glas, note in ne tribaju, šoldi ne pitaju, vodu ne piju, a ča je veća vrućina, ča bi rekal Stanko, to još više po svoju organaju.

 

Ben, ma ča se je dogodilo? Čistin ja niki dan onu debelu kupinu kolo kuće, kad na jednoj grani šervan ja jušto onoga mićega črškića sisića. Ma propijo je isti kako i onaj veli črčak, ali je mali kako ča san već rekal, ma jušto malo veći od one volovlje vele muhe. Ali ni pival. Bil je miran pa san ga molal na miru računajuć da će drugi dan zpivat, ma ne un sam nego i cela njigova kumpanija. Ali niš od toga. Kad utorak po danu, malo prid večer čujen ja pivade, ali ne od sisića nego od čačice, oli kakare. Ali jopet ne celu kumpaniju nego samo nju jednu jedinu.

Ma već na prvomu njihovomu koncertu, samo ću lipo sest i baren ću ih pol ure na miru poslušat. Neka mi dušu punu svi oni gušti od njihove pivade.

Ala šu, mislin se ja, zutra će ju se more bit čut one prve prave pivade. Ali ča ćeš vraže, evo ti po noći promine vrimena, pa sredu jutro kada san se zbudil čujen vani kako s potiha i daži. A daž i črški ne gredu nikakor skupa. I tako nit je bilo čut onoga maloga, a ni kakara se ni javila.

Ben, ma ako se kakare javu va većoj masi unda se njih ne more čut.

 

Inšoma, kako da je to važno, govorin ja jopet sam sobon, ki se od njih oće, a ki neće čut. Važno je i najvažnije da je čut kako črški pivaju i nosu veselje ovomu našemu kraju, pa unda i meni, a i vamin, nadan se. Ma već na prvomu njihovomu koncertu, samo ću lipo sest i baren ću ih pol ure na miru poslušat. Neka mi dušu punu svi oni gušti od njihove pivade.

 

Črški, Branka i Otočac

E, ali o črškiman ima i jedna druga ćakula. Povidala mi je još prije par godin moja nevča Branka kako su kod nih došli jedni gosti gori od Zagreba. Ozbiljniji ljudi, muž i žena. Kad već drugoga dana evo ti njih na dvoru i pruntivaju oni ozbiljnu žalbu. "Ma ča se je dogodilo?" - pita njih Branka. "Dogodilo se je", govoru oni ljuto i nezadovoljno, "da su ove nesretne beštije od črški tuliko neugodne i naporne, da nan ne daju mira ni po danu ni po noći. Po danu smo ludi od njihove pisme, a dodar nan ni na plaži ne daju mira. Urlaju i dibljaju po boriman da nan uši oćeju puknut, a po noći nan unda još sve to duron va ušiman brnči. To je nemoguća buka, strašno je, ma za poludit."

"Gospodo draga", govori njiman na to Branka, "pa to van je onaj pravi čar Mediterana, a i duh i zasebnost svakoga našega otoka. To su veli gušti, a ne muka!" Nateže se ona šnjiman, ali oni jopet ne i ne, to njiman smeta, oni oćeju mir, pa govoru njoj kako bi bilo najbolje da ona njiman pokaže kadi bi oni mogili, a baren kupat se na miru, a da ne čuju taj trubež ki in uši probija. A Branka se je naljutila pa je rastrla na tavlu auto-kartu i vreda je s prston badla i govori in: - "Evo! Evo, ovo ude morete poć i sigurno ih ne ćete čut." I ode Branka ljuta va kuhinju, a oni su vreda zavirili na mesto kadi in je s prston pakazala, ma su se ben i popazili kada su vidili da tamo piše - Otočac!

I povidala je ona meni tu ćakulu, a ja san ne samo bil zotin zadovoljan, nego san se zausput s velin gušton i nasmijal. "Ma bravo", govorin ja njoj, "baš si ih na pravo mesto uputila." A tribala in je još reć i to kako su dobro i pasali, boj črški se još znaju po čoviku i pocurat.

Po celi dan pivaju i ne piju vodu, ali kada ih zgor puta na boru oli črniki prestrašiš, oni ne samo da se javu i poletu, nego se zausput znaju i po namin popišat. Jo, ma ča bi mi bilo drago da su in baren još i to učinli.

 

Joso Fafanđel - za Kantunić (9.6.2022.)

Pročitano 375 puta

 

 RAT1 600

seakayakcroatia

 

BANNER350 BarbaSIME1