logo mix

Rab Danas

Nezavisni internetski portal otoka Raba

Gif animacija za zapoljavanje 2000x240px

 

Utorak, 30 Kolovoz 2022 10:11

Rapski kantunić Josa Fafanđela: ŠTOP! - "PRIVAT"

Napisao/la Josip Fafanđel
Ocijeni sadržaj
(1 glas)
Rapski kantunić Josa Fafanđela: ŠTOP! - "PRIVAT" Foto: Josip Fafanđel

Evo, osmi misec (agušt) se je zasvin parićal i pomalo gre ća. A brate moj i neka gre, boj san se već štuhal i njega i one njigove bure i one njigove vrućine. I neka ga bude sran, boj je dodar i črški potiral ća.

 

E tako, pa računan da će ovaj deveti misec bit puno bolji od njega, a to će za nas dodmaći bit i veća prlika za poć se malo gušće i va more umočit. Gosti će pomalo bit sve manje, pa ćemo se i mi moć komodnije do mora dosmucat. A budući da smo od naših gosti malo i beliji, manje će se moć pomalo i z namin i rugat. Boj, oni su hiljade kilometri pasali ma su in guzičice (da prostite) lipo počrnile, a naše su bele, ma još i puno belije od paškoga sira. Inšoma, gre pomalo i naše vrime za more se tumbat.

 

Ali, kad evo ti ga vraže na, čitan ovih dan po našiman portalima i facebooku (Rapski žulj, Rapski čuvar...) da se jušto parićiva novi Zakon o pomorskomu dobru, po komu bi se lako moglo dogodit da se i javne plaže latimo pomalo zagrađevat. A kadi su ograde i ploti, računan ja, tude unda gredu i vrata, a i lokoti. E to mi se baš i ne bi jako pijažalo.

 

Pametin da san odavna već Drazi, na otočiću Mamnu šerval lipu plažicu na koj je pisalo PRIVAT, pa san se na to grubo naježil. Dabome, a još više san se naježil na ono kada je, ne tako odavna, čovik va Brbatu tiral gosti z lopaton, boj da je to njigova plaža. Da, jopet ono privat.

 

I unda san se vreda domislil da i ja i moj brat skupa imamo va Kalefrantu, va dragi od Kanitlja, jedan lipi komad gušća, pa me je od jada ćapivala hotada da iden tamo i vreda na mociru zalipin malo veću belu tabelicu na koj ću i ja napisat ono muderno PRIVAT. Oštija, a zač da i po našoj parceli gazu gosti, miši, zeci, jeleni, fazani i pužu gadi kada je i to tobože privat! Dabome, hotada me je ćapivala, ali siguran san da to ni ja ni moj brat ne bimo nikad učinli.

A unda me je niki dan vrag tental da se z auton malo zaletin tamo onin puten ča gre do Punte Frkanja. Vozin pomalo, boj odavna nisan tamo bil, kad eto ti ga vraže na, i tamo samo tabelice privat, oli ploti, zidi i ograde. Ala šu, kada san već tamo da gren unda malo i doli po onomu putu do Gožinke. A nisan ni tamo već odavna bil. Ali jopet sve na isti mod - redon i tamo slikivan ograde i tabelice, tobože da štop boj je ovo privat. Z live bande na pol puta šerval san i jednu lipu stazicu unako va zlenilu, pa mi je diboto hodila volja da učinin sto koraci za vit kadi stazica gre i ča mi sve lipoga more ponudit. Ali jok, samo ča san koraknul z auta van, evo ti ga i na toj stazici bela tabelica na koj piše privat. To pari - štop!, ni tamo se ne smi.

 

Ma ča se ovo dogaja, pitan ja sam sebe? I unda san se vreda domislil da i ja i moj brat skupa imamo va Kalefrantu, va dragi od Kanitlja, jedan lipi komad gušća, pa me je od jada ćapivala hotada da iden tamo i vreda na mociru zalipin malo veću belu tabelicu na koj ću i ja napisat ono muderno PRIVAT. Oštija, a zač da i po našoj parceli gazu gosti, miši, zeci, jeleni, fazani i pužu gadi kada je i to tobože privat! Dabome, hotada me je ćapivala, ali siguran san da to ni ja ni moj brat ne bimo nikad učinli.

 

Ben, ma vidil san evo samo na malomu delu Raba da se to pomalo, ali i na velo čini. Otvorin mobitel i evo ga na, tamo su drito i ovo napisali: ...Na Rabu se i danas parićiva ograđivanje makar jedne plaže tamo na rtu Suha Punta.

 

I ča na to reć nego da mi se zazbilja sve to njanci malo ne pijaža. Ali dogaja se, kako po obali i gušćiman, tako sada korak po korak i va našemu Šarengradu. I tamo se pomalo pruntivaju tabelice, ograde od kadine i oni veli žuti lokoti. A sve se more na bolji mod parićat. Ma lipota za vit! Pa ti sada tamo korakni oli ne korakni. A bolje je ne koraknut, boj nikad ne znaš kadi te sve more čekat još kakova lopata.

 

Ali arivat će pomalo i črna zima kada ćemo sami ostat na školju i kada će bit dosta vrimena da se o svemu još jedan put i malo bolje razmisli, da se načinu nove inventure, da se ča to i promini i za drugu godinu i bolje parića. Boj ne bi bilo dobro da celu zimu va bužamin prespimo - jušto kako oni lički medvidi.

 

Joso Fafanđel - za Kantunić (29.8.2022.)

Pročitano 484 puta

 

 RAT1 600

seakayakcroatia

 

BANNER350 BarbaSIME1