logo mix

Rab Danas

Nezavisni internetski portal otoka Raba

Gif animacija za zapoljavanje 2000x240px

 

Petak, 09 Rujan 2022 18:35

Rapski kantunić Josa Fafanđela: PRVAŠIĆI

Napisao/la Josip Fafanđel
Ocijeni sadržaj
(1 glas)
Rapski kantunić Josa Fafanđela: PRVAŠIĆI Foto: Josip Fafanđel

Sve san se mislil oću napisat uvako, oli neću. Tobože, da je školska godina počala i da jadna dica moraju poć va školu. I nemojte se čudit zač san rekal jadna dica. A računan da su jadna zato boj ki zna kulko od njih i voli poć va školu, a drugo, celo leto su bili na slobodi, tekli su po moru i okolo po zraku, a sada jopet nutra va zatvor.

 

Pitan se ča mladi činu po Kamporu kad tamo imamo samo 3 upisana prvašića. A baš svi imaju i lipe kuće i lipe postilje. Da ne rečen kako je po Kamporu za vit i lipoga grmlja, a i veli bori po Kalefrantu. Dabome, sve to vridi i za Loparani, boj i njihovih prvašićev bi moralo bit puno više. A njihovi mladi imaju sve ono ča i Kamporci, a unda još i općinu ka će ih i nagradit ako in se ko dite i priko mere omakne.

Da, oni teški torbaci na rame, pa nutra va školu. Ali dica su dica pa će ju se oni vreda na to novo naučit. Jednako kako oni ča su već do sada hodili va školu, tako i oni prvarići ča moraju donest prazne torbe sobon da ih već prvog dana va školi napunu. Da, da, one vele i teške torbine ke su krive da jadna dica unako pošuljeno hodu, kako da se šuljaju za golubiman, rekal bi jedan put onaj Kamporac, pokojni Agušt.

 

Ben, ma jadna su po moju dica i zato, boj leto još dura, a vani su lipa i tepla vrimena pa smo ih mogli još malo pustit da teku po vanu i va moru se praćakaju. Oštija, a ni mi brate ćaro koga vraga je takova preša, a godina je vela, a i ona školska ni jako manja. Ala šu, jedino je srića da ne moraju za sada nosit one vražje trubice (maske) priko njihovoga diteskoga obraza. Ali sve me je strah da bi ove zime moglo nanovo i do toga doć. I ne samo za dicu nego i za nas, dabome. I zato, evo lipo jedne vele rozi koroni!

 

E ma bilo mi je jako drago i vit i čut kuliko je ove godine šlo novih školantov na Rabu va školu. Tobože onih prvarićev, oli prvašićev. Pa evo, kako san pročital, tako ću van i reć. Recimo, govoru da su ove godine na celomu Rabu, a to znači i Lopari, upisana va školu 84 nova školanta. A to bi bili ti prvašići, ča nas najviše i zanimaju, boj to govori kuliko će nas bit na Rabu za ubuduće. Ma ne samo to, ali i to, dabome. A stvari stoju uvako: Va školu Gradu da je upisano 35 prvarićev, pa unda va Brbatu 14, Banjolu 8, Mundanije 4, Draga 13, Kampor 3 i Lopar 7. To ove godine stoji tako, a meni je sada krivo da ne znan kakovo je stanje, recimo, bilo lani, pa da se more to malo stavit jedno kuntra drugomu.

 

Uvako na prvu se i ne čini puno, ali budući da ja to niman redovito navar, unda je bolje slušat onih ki to bolje znaju. Ben, ma iman i ja oči pa nike stvari isto moren šervat. Oni ča su Gradu upisani, njih je odasvud: i od Palita i Grada i del od Banjola, računan, pa ih je zato i najviše. Tobože, 35. A od drugih mesta, pari mi se, da su se ovoga puta najviše svorcali mladi Brbaćani i Dražani. Brbat 14, a Draga 13. A Kampor mi je nikakor jako zaostal. Samo 3 prvašića, pa se pitan da ča mladi činu po Kamporu. A baš svi imaju i lipe kuće i lipe postilje. Da ne rečen kako je po Kamporu za vit i lipoga grmlja, a i veli bori po Kalefrantu. Dabome, sve to vridi i za Loparani, boj i njihovih prvašićev bi moralo bit puno više. A njihovi mladi imaju sve ono ča i Kamporci, a unda još i općinu ka će ih i nagradit ako in se ko dite i priko mere omakne.

 

I zato sviman mladiman valja poručit jedino ono, da ala, ča se čeka!

 

E da su naši stari imili uvako lipe postilje, a kuliko bi nas danas bilo na ovomu našemu lipomu Rabu!

 

Joso Fafanđel - za Kantunić (9.9.2022.)

Pročitano 501 puta

 

 RAT1 600

seakayakcroatia

 

BANNER350 BarbaSIME1