logo mix

Rab Danas

Nezavisni internetski portal otoka Raba

IMP2022 Gif animacija

 

Petak, 30 Rujan 2022 23:09

Rapski kantunić Josa Fafanđela: KAMPANANJE

Napisao/la Josip Fafanđel
Ocijeni sadržaj
(3 glasa/-ova)
Rapski kantunić Josa Fafanđela: KAMPANANJE Autor fotografija Miroslav Maroević - Iz arhivske zbirke Josipa Andrića

Pisal san niki dan o našemu Malinu (Mlinici) na Rabu, ki je va zadnje vrime dosta zabolil, pa ne samo da više ne melje nego jako boluje i propada. Dabome, to su grube novitade, ali ovoga putu nećemo o grubiman nego o oniman lipiman.

 

Ma jušto me je jako radovalo ono kada san niki dan pročital ćakulu o našiman zvonariman na Velomu zvoniku. Bili su to Žarko Vidas i Srećko Deželjin. Prvo, ja duron govorin da je za mene naš Veli zvonik najlipji zvonik na celomu Jadranu, a još i malo dalje. Ne zato ča je naš, nego je zazbilja lipi i na svaki modi šestan. Diboto kako mladić, ma ki se ne prečinja.

 

...A kampananje je, po meni, više ime za svirit, nego za zvonit. Lipo je za čut zvona kada zvonu, ali još je veći gušt slušat kada majstor na zvoniman kampana.

A drugo, veselilo me je ča su tamo spominjali, ne zvonjavu, nego kampananje. To mi je nanovo tornalo spomin na moga pokojnoga oca, boj pametin i dan danas, kako je i un šesno znal kampanat, Drazi na zvoniku od crikve svetoga Petra. Evo, jušto sad ga ozdola vidin kako med ona dva vela zvona va rukah drži one dvi poluge i kampana va pravomu taktu.  Imil je un i smisla za to. A kako neće imit kada je bil i veli majstor za svirit tanac na našemu mihu. A kampananje je, po meni, više ime za svirit, nego za zvonit. Lipo je za čut zvona kada zvonu, ali još je veći gušt slušat kada majstor na zvoniman kampana.

 

I treće, razveselilo me je ča san po prvi put vidil sliku od znanoga Loncula ki je bil onaj stari i pravi zvonar Gradu, od Veloga zvonika. A računan da je i un znal kampanat. A diboto da svi stariji Rabljani znaju zvonara Loncula, pa se je tako našal i va pismi Kad podne zvoni sa rapskoga zvonika...

 

U pjesmi opjevani rapski zvonar Anton Godinić Lonculo

 

Inšoma, rado i danas poslušamo tu lipu baladu o diteskomu životu va Gradu i o našemu Lonculu i njigovoj Lonculki. Riči za pismu napisal je, nažalost pokojni, Boris Beg, glazbu su našesali Nesner i Baša, a pival je, nažalost isto pokojni, Toni Kljaković. A sve to za prvi put smo čuli na festivalu Melodije Istre i Kvarnera još 1980.godine.

 

Valja reć da zvona zvonu i na drugiman zvoniciman, boj uz onoga veloga imamo mi još i ona tri manja. I tekar svi zajedno činu onu lipu kumpaniju od četiri rapska zvonika. E, a unda nisan ni ja mogal od manjega, pa san napisal i svoju pismu o ta naša četiri zvonika, oli kampanela. Jušto tako san je i ime dal:

 

NAŠI KAMPANELI

Četiri zvonika

Četiri kampanela

Z mora se vajer dižu

Ala jarbulov se jarbulaju.

Od Giljarde kad ih gledan

Stišću se, grlu i bušnjuju

Vrh grada se kumpanjaju

Četiri zvonika

Četiri kampanela

Četire lanterne

Ke nas peljaju i avizaju

Zvonici

Ki su za viru i dušu zvonili

Kampaneli

Ki se z vrimenon boru

I za sva vrimena duraju

I ki nan još i dan-danas

Duron

I zvonu i kampanaju.

 

Joso Fafanđel - za Kantunić (30.9.2022.)

 

 

Pročitano 414 puta

 

 RAT1 600

seakayakcroatia

 

BANNER350 BarbaSIME1