logo mix

Rab Danas

Nezavisni internetski portal otoka Raba

IMP2022 Gif animacija

 

Utorak, 11 Listopad 2022 08:43

Rapski kantunić Josa Fafanđela: PULENTA I BRUDIT

Napisao/la Josip Fafanđel
Ocijeni sadržaj
(2 glasa/-ova)
Rapski kantunić Josa Fafanđela: PULENTA I BRUDIT Foto: Petar Lupić

Da, da - svi smo se pomalo prestrašili da će potle leta mrzlo vrime na prešu arivat. Kalmale su one vrućine pa su se na jedan put i gosti prestrašili i utekli su doma kako opareni. Da ne rečen kako san po cesti počal kuntrivat i oni mali kamijoni ki vozu drva na Rab, a i to je jedan sinjal ki drugi štajun navišćuje.

 

Ali o ribariji se more na više modi govorit. A jedan mod je i laganje, dabome. Kada te ki pita ča si ćapal unda je gušt jednu zeru i zalagat. A ki laže, više puti se malo i zabuni i zaplete...

Pa smo unda naprešno i duge gaće obukli, a i košulje z dugiman rukaviman. Ali pital je niki dan jedan onoga Vakulu da oće bit još lipoga vrimena, oli neće? A Vakula, kako Vakula, uvik je dobre volje pa mu govori kako ni straha, boj da će ovih dan i bablje leto arivat. I evo, jušto kako je Vakula rekal, tako se je i dogodilo. Arivala je duga šetemana od babljega leta. Lipo vrime, ćareca od neba, teplo sunce, a vetrić mali ma samo ča zdiše, pa i zerica od ćare bure.


Ma vrime jušto svakomu na volju. Vrime za laurat, vrime za kupat se, a i vrime za kakovoga arbunića, oli lignicu ćapat. Za jedan primjer, iman jednoga prijtelja, a i suseda, koga san naučil lovit ribu, pa sada kada ja va zdanje vrime malo gren na more, un se je latil sam toga posla. I neka, govorin ja sam sebi, niman ja niš kuntra toga, neka un gre na more i neka ribu lovi. To više ča je jedno vrime imil i lipi nauk, tobože da ki put kada lati ribe unda donese šakicu i meni, pa ja moran ribu očistit, a moja parona mora drugi dan učint brudit i to s pulenton. A unda, ne budi leni, zovemo mi njega, a i veću kumpaniju na taj brudit. I sve je to pomalo šlo va redoviti nauk.


A znate zač najviše? A zato brate boj da moja parona učini tako dobar brudit da ni nego potle ubroka još i prsti polizat. Pa sada, kada je ki put to i dojadi, reče sama sebi, da ča se tudi more, kada je za sve sama kriva. I je, ali ni svako zlo za zlo. Dobar ubed, ma va dobroj kumpaniji, više puti i ni za hitit ća.


Ben, ma ja san otil niš drugo reć, ono ča mi taj prijatelj duron poručuje, a to je da je ove godine duplo manje ribe mori, nego lani, recimo. E sad, govori un to zato samo da šemprije ne donese meni ribe, oli je zazbilja tako?! A moran mu virovat boj su mi to i niki drugi rekli. Manje da je i plave ribe, a i lignica da se jako naretko prevari. Da, ma sva je nikakor čudnovata ova godina za ribu, a i za verduru i voće. A ni bilo ni dažja, pa kako da je suša sve zatrla. A bit će da i ribi to pači. Ma sve brate napak, bi rekal moj sused! Ma ne onaj ča lovi ribu, nego onaj drugi. A ovaj ča ribu lovi, a njemu jedino moren poručit, da prvoga dana kada more zbonaca neka se jopet zaleti malo na more. Oćo, vani pod moju smokvu još se uvik more na komodu ubedvat.


Ali o ribariji se more na više modi govorit. A jedan mod je i laganje, dabome. Kada te ki pita ča si ćapal unda je gušt jednu zeru i zalagat. A ki laže, više puti se malo i zabuni i zaplete. Kako ča je onaj jedna rekal da je latil samo dvi ligne, tobože, jednu velu i jednu malu. Ali da je va njiman bilo, a diboto dva kila, boj da je ona veća imila pol kila, a va onoj manjoj da je bilo dobrih kilo i pol.


A jedan mi je ovih dan povidal kako je i pokojni Kika jedan put bil s kumpanijon namori. Ma oni da su kalali mriže, ali da je i njiman sve šlo napak. Pitali su ga da kako je bilo, da ča su ćapali, a un da in govori kako su ćapali vraga paklenoga. Tobože, da su na Kalefrantu kalali mrižu, ma malo dumblje, ali da je tamo par dan prije niki ludi Dražanin hitil špaher more, pa du su misto ribe digli špaher va mriži. A znaš ti ćo, govoru jedni njemu, da špaher niš mori ne smeta, nego da se još kolo njega više ribe skupi. A Kika da in nato govori: "E da, ma ovaj špaher ča smo ga digli ni bil prazan, nego je nutri va njemu još zbica drv gorila".

Imil je Kika pravo, kaj će riba na oganj!

 

Joso Fafanđel - za Kantunić (10.10.2022.)

 

 

Pročitano 429 puta

 

 RAT1 600

seakayakcroatia

 

BANNER350 BarbaSIME1